Na mwandishi wetu, Dodoma
Waziri wa Mambo ya Ndani ya Nchi, Patrobas Katambi, ametoa maagizo 10 ya msingi kwa watumishi wa wizara hiyo, akisisitiza umuhimu wa kuzingatia nidhamu, haki, weledi na uadilifu katika utekelezaji wa majukumu yao ya kulinda raia na mali zao.
Akifungua Kikao cha Baraza Kuu la Wafanyakazi wa Wizara ya Mambo ya Ndani kilichofanyika jijini Dodoma, Katambi alieleza kuwa utekelezaji madhubuti wa maagizo hayo ni msingi wa kufikia malengo ya Serikali ya Awamu ya Sita inayoongozwa na Samia Suluhu Hassan.
Kikao hicho kilihudhuriwa na viongozi mbalimbali wa juu wa wizara, wakiwemo Katibu Mkuu Ally Senga Gugu, pamoja na wakuu wa vyombo vya ulinzi na usalama na taasisi zilizo chini ya wizara hiyo.
MKAZO WA MAAGIZO 10
Katika hotuba yake, Katambi aliweka bayana maeneo kumi ya kupewa kipaumbele ili kuongeza ufanisi na uwajibikaji kazini:
1. Utekelezaji wa mipango ya wizara:
Kusimamia kwa ufanisi mpango mkakati, dira na majukumu ya wizara ili kufikia malengo ya kitaifa.
2. Kuzingatia miongozo ya sera:
Kufuata sera za kitaifa, kikanda na kimataifa katika utekelezaji wa majukumu.
3. Upandishaji vyeo kwa wakati:
Kuhakikisha watumishi wanaostahili wanapandishwa vyeo kwa haki na kwa wakati.
4. Malipo ya stahiki za watumishi:
Kulipa kwa wakati madai ya wastaafu, likizo, uhamisho na haki nyingine ili kupunguza madeni ya Serikali.
5. Uzingatiaji wa sheria na maadili:
Watumishi wanapaswa kutekeleza majukumu kwa kuzingatia sheria, haki na maadili bila matumizi mabaya ya madaraka.
6. Ufanisi na tathmini ya utendaji:
Kuimarisha uwajibikaji, kufanya tathmini za mara kwa mara na kurekebisha maeneo yenye mapungufu.
7. Maslahi na haki za watumishi:
Kuhakikisha mazingira bora ya kazi, haki na fursa za maendeleo ya kitaaluma zinazingatiwa.
8. Mafunzo na ujuzi:
Kutoa kipaumbele kwa mafunzo, warsha na programu za kuongeza weledi ili kuboresha utendaji.
9. Usalama na maadili ya kazi:
Kudumisha usalama kazini pamoja na kuzingatia maadili ya utumishi wa umma.
10. Mawasiliano ya ndani ya taasisi:
Kuimarisha mawasiliano kati ya idara na vitengo, ikiwemo mazungumzo ya ana kwa ana kabla ya mawasiliano ya maandishi, pamoja na kulinda siri za kazi.
LENGO: HUDUMA BORA KWA WANANCHI
Akihitimisha hotuba yake, Katambi alisisitiza umuhimu wa kufanya tathmini ya matumizi ya bajeti na rasilimali zilizopo ili kuongeza tija na kuhakikisha huduma bora kwa wananchi, hususan katika kulinda maisha na mali zao.
Amesema utekelezaji wa maagizo hayo utaimarisha utawala bora na kuongeza imani ya wananchi kwa taasisi za usalama nchini.
Social Plugin