Katika ulimwengu unaokwenda kasi kidijitali, matumizi ya teknolojia ya Akili Unde (AI) yanapaswa kutazamwa kama fursa ya kiuchumi na si chombo cha kawaida cha kutafuta taarifa pekee.
Wadau wa elimu nchini, wakiwemo wanafunzi wa vyuo vikuu, wametakiwa kubadili mtazamo wao na kuanza kuitumia teknolojia hiyo kama nyenzo ya kujiletea manufaa ya kifedha na chachu ya mabadiliko binafsi.
Badala ya kuona Akili Unde kama kitu cha kusababisha vurugu au kurahisisha kazi kwa uvivu, matumizi sahihi ya akili hiyo ya kiteknolojia yanatajwa kuwa na uwezo wa kufungua milango ya uzalishaji na ubunifu utakaotengeneza ajira na kuimarisha kipato cha vijana.
Wito huo wa mageuzi ya kifikra umetolewa wakati wa mdahalo maalum uliowakutanisha wabunifu na wasomi, ulioandaliwa na Chuo Kikuu cha Sayansi na Teknolojia Mbeya (MUST) kwa kushirikiana na Chuo Kikuu cha Sayansi na Teknolojia cha Wrocław cha nchini Poland.
Katika mdahalo huo, ilibainishwa kuwa iwapo Akili Unde itatumiwa vizuri, itakuwa ni injini muhimu ya kujenga uchumi imara na kuleta maendeleo endelevu. Washiriki walihimizwa kuacha kuitumia teknolojia hiyo kwa mambo yasiyo na tija, badala yake waelekeze nguvu katika kutatua changamoto za jamii zinazoweza kugeuzwa kuwa miradi ya kiuchumi.
Msisitizo mkubwa umewekwa katika ukweli kwamba akili ikitumiwa kwa weledi, matokeo yake ni ukuaji wa uchumi, lakini ikitumiwa bila malengo, inaweza kuleta mkanganyiko katika mifumo ya elimu na kijamii.
Ushirikiano huu wa kimataifa kati ya MUST na chuo cha Poland unalenga kuwajengea uwezo wanafunzi wa Kitanzania kuwa washindani katika soko la dunia kwa kutumia Akili Unde kama rungu la kupambana na umaskini. Kwa kufanya hivyo, teknolojia haitakuwa tishio tena, bali itakuwa mshirika wa kimkakati katika safari ya kuelekea uchumi wa kisasa unaotegemea maarifa na ubunifu wa hali ya juu.
Social Plugin