Licha ya kuwepo kwa kampeni za uchochezi na miito ya kutatiza amani inayosambazwa, hasa kwenye mitandao ya kijamii, jamii ya kimataifa imedhihirisha imani yake thabiti kwa Tanzania, ikisisitiza kuwa nchi inaendelea kuwa mahali salama na pa kuaminika kwa mikutano mikubwa na uwekezaji.
Ushahidi wa hivi karibuni ni kuchaguliwa kwa Arusha kuwa mwenyeji wa Mkutano wa Umoja wa Mabunge Duniani (IPU), tukio la kihistoria linalotarajiwa kuhudhuriwa na wajumbe zaidi ya 1500.
Mwaliko huu maalum unamfanya Rais wa Jamhuri ya Muungano wa Tanzania, Mhe. Dkt. Samia Suluhu Hassan, kuwa mgeni rasmi kwenye mkutano huo muhimu unaokusanya Maspika, Wabunge, na viongozi mbalimbali kutoka nchi wanachama wa IPU.
Mwaliko wa IPU Uthibitisho wa Amani
Uteuzi wa Tanzania kuwa mwenyeji wa mkutano huu unasisitiza uhusiano mzuri wa kimataifa unaoendelezwa na Mhe. Rais Dkt. Samia Suluhu Hassan, unaochangia kufungua fursa nyingi za kiuchumi na uwekezaji.
Akipokea Ujumbe wa IPU ulioongozwa na Balozi Ande Filip, Mkuu wa Mkoa wa Arusha, Mhe. CPA. Amos Gabriel Makalla, alisisitiza umuhimu wa tukio hili kwa Taifa. "Tanzania ni Mwenyeji na sababu kubwa ni ushiriki na historia yake katika IPU na kikubwa zaidi ni namna wao wanavyoiona Tanzania," alisema Mhe. Makalla.
Mhe. Makalla alibainisha kwamba mkutano huu unakuja wakati mzuri katika kudhihirisha amani, usalama na utulivu uliopo nchini na kuaminika kwa Tanzania Kimataifa. Hii inathibitisha kuwa, tofauti na propaganda za uchochezi, dunia bado inaiona Tanzania kama nchi yenye utulivu.
Fursa Kubwa za Kiuchumi na Utalii
Balozi Ande Filip, kwa niaba ya ujumbe wa IPU, alieleza kuwa mkutano huo utafanyika kwa siku sita Jijini Arusha, na washiriki wake watakuwa na zaidi ya siku sita Mkoani Arusha ili kutembelea maeneo ya kihistoria na vivutio vya utalii.
Mhe. Makalla aliwataka wananchi wa Arusha na Watanzania kwa ujumla kujiandaa kutumia fursa kubwa za kiuchumi zitakazoletwa na ujio wa wageni hawa. Ujumbe wa wajumbe zaidi ya 1500 una maana ya kuongezeka kwa mahitaji ya huduma, ikiwemo malazi, usafiri, na manunuzi. Hii inatafsiriwa kuwa faida ya moja kwa moja kwa wafanyabiashara wadogo na sekta ya utalii, ikionyesha faida halisi za utulivu wa ndani.
Watanzania wamehimizwa kudumisha amani na umoja wao, kwani utulivu wa ndani ndio ufunguo wa kuendelea kuleta maendeleo na kuvutia fursa zaidi za kiuchumi na kuaminika kimataifa.
Social Plugin