MAGEUZI YA SOKO LA KILIMO: TPHPA YAFUNGUA MILANGO YA TRILIONI 15 DUNIANI

 

Mamlaka ya Afya ya Mimea na Viuatilifu Tanzania (TPHPA) imepiga hatua kubwa katika kuimarisha uchumi wa taifa kwa kuwezesha upatikanaji wa masoko ya mazao ya kilimo nje ya nchi, hatua inayochochea ukuaji wa biashara ya kimataifa. 

Katika kipindi cha kuanzia mwaka 2020/21 hadi 2023/24, mamlaka hiyo imefanikisha usafirishaji wa zaidi ya tani milioni sita za mazao mbalimbali yakiwemo mbogamboga, nafaka, matunda, na maua kwenda katika masoko ya kikanda na kimataifa. 

Mkurugenzi Mkuu wa TPHPA, Profesa Joseph Ndunguru, amebainisha kuwa thamani ya mauzo hayo imefikia dola za Marekani bilioni 6.6, kiasi ambacho ni sawa na takriban Shilingi trilioni 15.6 za Kitanzania, kikiakisi ufanisi wa mifumo ya ukaguzi na udhibiti mipakani.

Ongezeko la thamani ya mauzo limekuwa la kuridhisha ambapo katika mwaka wa fedha 2023/24 pekee, Tanzania ilisafirisha tani milioni 3.5 nje ya nchi zenye thamani ya dola bilioni 3.54, ikiwa ni ukuaji wa asilimia 25.4 ikilinganishwa na mwaka uliotangulia. 

Mafanikio haya yamechagizwa na ufunguzi wa masoko mapya ya kimkakati, ikiwemo soko la parachichi nchini Afrika Kusini, India, na China, pamoja na mauzo ya soya na alizeti kwenda China.

Aidha, juhudi za mamlaka zimeifikisha Tanzania katika hatua za mwisho za kufungua masoko ya mahindi meupe na viungo nchini China, pamoja na soko la parachichi nchini Marekani, hali itakayoongeza wigo wa kipato kwa wakulima wa ndani.

Kuelekea siku zijazo, TPHPA inaendelea na mikakati ya kufungua masoko mapya kwa ajili ya ndizi nchini Afrika Kusini, maembe katika nchi za Saudi Arabia, Oman na Kuwait, pamoja na mauzo ya maua kwenda Marekani na Vietnam. 

Juhudi hizi za kuimarisha diplomasia ya uchumi kupitia sekta ya kilimo zinatarajiwa kuongeza mnyororo wa thamani na kutengeneza ajira kwa vijana na wanawake walioajiriwa katika sekta hiyo.