SMZ KUILINDA AMANI KWA GHARAMA ZOTE

Serikali ya Mapinduzi ya Zanzibar (SMZ) imesisitiza msimamo wake wa kuendelea kuilinda amani na utulivu wa visiwa hivyo kwa gharama zote, huku ikiwatahadharisha wanasiasa kuacha tabia ya kuwashawishi vijana kujiingiza katika vurugu kwa ajili ya maslahi yao binafsi ya kisiasa. 

Makamu wa Pili wa Rais wa Zanzibar, Hemed Suleiman Abdulla, ametoa kauli hiyo wakati akijibu hoja za wajumbe wa Baraza la Wawakilishi kuhusu makadirio ya mapato na matumizi ya ofisi yake kwa mwaka wa fedha 2026/2027. 

Amesema kuwa Zanzibar imeshuhudia utulivu mkubwa uliowezesha Uchaguzi Mkuu wa Oktoba 29 mwaka jana kufanyika kwa amani na usalama, jambo ambalo limejipatia sifa kupitia ripoti za waangalizi wa ndani na nje ya nchi.

Amebainisha kuwa wananchi wa Zanzibar wamechoshwa na vurugu za kisiasa zinazowanufaisha viongozi wenye uchu wa madaraka, hivyo Serikali ya Awamu ya Nane imeelekeza nguvu zake zote katika kutekeleza Ilani ya Uchaguzi ya CCM ya mwaka 2025–2030 kupitia miradi ya kimkakati. Abdulla amewahakikishia wananchi kuwa ulinzi wa amani utaendelea kuimarishwa ili kutoa fursa kwa shughuli za kiuchumi, biashara, na uwekezaji kufanyika bila hofu. 

Alisisitiza kuwa lengo kuu la serikali kwa sasa ni kuhakikisha kila mwananchi ananufaika na matunda ya utulivu uliopo kwa kuendeleza miradi ya maendeleo inayowagusa watu wote.

Katika kukuza uchumi wa visiwa hivyo, serikali imejipanga kukifungua Kisiwa cha Pemba kupitia miradi mikubwa ya uwekezaji ambapo Rais wa Zanzibar, Dk. Hussein Mwinyi, anatarajiwa kuwa mgeni rasmi katika Tamasha la Pili la Kimataifa la Uwekezaji. 

Tamasha hilo linalenga kuwakutanisha wawekezaji kutoka pande mbalimbali duniani ili kujadiliana na kutangaza fursa zilizopo Zanzibar, hususan katika maeneo huru ya kiuchumi yaliyopo Micheweni. 

Serikali imedhamiria kuvutia uwekezaji kwenye viwanda vya kuchakata mazao kama mwani na samaki ili kuongeza thamani ya bidhaa za uchumi wa buluu na kukuza kipato cha wananchi wa maeneo hayo.

Maendeleo hayo yamekuja wakati Baraza la Wawakilishi likipitisha jumla ya shilingi bilioni 135.6 kwa ajili ya makadirio ya mapato na matumizi ya Ofisi ya Makamu wa Pili wa Rais kwa mwaka wa fedha 2026/2027. Fedha hizo zimeidhinishwa kwa ajili ya matumizi ya kawaida na utekelezaji wa miradi ya maendeleo, zikilenga kuimarisha ufanisi wa serikali na kuhakikisha mipango yote ya kimkakati inafikiwa. SMZ inaamini kuwa kwa kupitia uwekezaji makini na utulivu wa kisiasa, Zanzibar itazidi kupiga hatua kubwa kuelekea ustawi wa kijamii na kiuchumi kwa watu wake wote.