Na Abby Nkungu, Singida
DHANA potofu iliyojengeka miongoni mwa baadhi ya wazazi na walezi Manispaa ya Singida kuwa watoto wenye ulemavu hawastahili wala hawana haki ya kupata elimu ya awali imepungua, kufuatia kundi hilo kuanza kuandikishwa na kusoma kama ilivyo kwa wengine.
Awali, ilielezwa kuwa kukithiri kwa imani potofu miongoni mwa baadhi ya wananchi ni moja ya sababu ya watoto wengi wenye ulemavu wa aina mbalimbali kutokupata elimu ya awali kutokana na kufichwa nyumbani bila kwenda kuandikishwa shuleni hadi wanapokuwa wakubwa kupindukia.
Hali hiyo, ilidaiwa kuathiri kwa kiasi kikubwa maendeleo ya watoto hao kitaaluma kiasi cha kufanya vibaya kwenye masomo yao ya kila siku darasani na mitihani ya kitaifa mwaka hadi mwaka.
Hata hivyo, Mwalimu Mkuu wa shule ya Msingi Tumaini Viziwi ya Mjini Singida, Francis Edward baada ya kutumia viongozi wa Serikali za mitaa, dini, mila, watu maarufu na vyombo vya habari kupinga dhana hiyo potofu, sasa watoto hao wameanza kuandikishwa shule wakiwa na umri unaostahili.
“Tangu kuanzishwa kwa shule hii ya Viziwi miaka 18 iliyopita, tulikuwa hatujawahi kupata wanafunzi wa awali lakini baada ya nyie waandishi wa habari kuja na kuandika kwenye vyombo vyenu, dhana hii iliyoota mizizi imeanza kupungua na kwa mara ya kwanza tumeandikisha watoto watano” alisema.
Alifafanua kuwa watoto hao watano; wakiwemo wavulana wanne na msichana mmoja, ni idadi ya kutosha kwa mujibu wa Sera ya elimu kwa watoto wenye mahitaji maalum ambapo idadi darasani inatakiwa kuwa kati ya wanafunzi 5 hadi 10 ili kuweza kuwahudumia vyema kitaaluma.
Mwalimu Edward alieleza kuwa kuandikishwa kwa watoto wenye ulemavu katika shule za Awali kutawajengea uwezo wa kufanya vizuri kwenye masomo yao pindi wanapoingia darasa la Kwanza tofauti na hapo mwanzo ambapo watoto hao walikuwa wanaandikishwa wakiwa na umri kati ya miaka 10 na 15.
“Hapo kabla, watoto hawa walikuwa wanafichwa majumbani hadi wanapogundulika baadae sana wakiwa wakubwa na kuletwa hapa shuleni wakiwa na miaka zaidi ya 10. Hatukuwa na namna zaidi ya kuwapeleka darasa la Kwanza moja kwa moja; hivyo kuwavusha darasa la Awali” alifafanua.
Alisema kuwa hali hiyo ilikuwa inawaathiri kielimu watoto hao kwa kuwa walikosa msingi muhimu ambao hutolewa katika shule za awali ili kumjenga mtoto kiakili na kimwili katika kupokea masomo yake ya madarasa ya juu.
Baadhi ya wananchi wameshauri kuwa njia pekee ya kumaliza changamoto hiyo ni kwa wadau kuendelea kutoa elimu kwa jamii juu ya umuhimu wa elimu ya awali kwa watoto wenye ulemavu badala ya kuwaficha nyumbani lakini pia kuwashirikisha wanasiasa katika jambo hilo.