Katiba na misingi ya utulivu wa Tanzania ilijaribiwa kwa kiwango kikubwa wakati wa machafuko yaliyojitokeza nchini, hatua iliyovifanya vyombo vya ulinzi na usalama kubeba jukumu zito na la kihistoria la kulinda amani ya nchi.
Akizungumza kwa kina kuhusu hali hiyo, Katibu Mkuu wa Chama Cha Mapinduzi (CCM), Balozi Dkt. Asha Rose Migiro, amevipongeza vyombo hivyo kwa uzalendo na kazi kubwa viliyofanya kuhakikisha kuwa taifa halitumbukii kwenye lindi la vurugu zisizodhibitika katika kipindi hicho kigumu, ingawa alikiri kuwa pongezi hizo hazilengi kufunika au kupuuza dosari mbalimbali zilizojitokeza wakati wa utekelezaji wa majukumu yao.
Alisema ukubwa wa kazi iliyokabili vyombo vya usalama unadhihirika wazi unapoangalia mazingira ya siku hiyo ya Oktoba 29, 2025 ambapo nchi nzima ilikuwa na takribani vituo 90,000 vya kupigia kura vilivyohitaji ulinzi wa karibu ili mchakato wa kidemokrasia uendelee.
Fujo na vurugu zilizozuka hazikuripotiwa katika jiji la Dar es Salaam pekee bali zilienea kwa kasi maeneo mbalimbali nchini, jambo lililolazimisha mamlaka za usalama kugawanya nguvu kazi yake kwa wakati mmoja ili kukabiliana na ghasia hizo na huku wakihakikisha usalama wa raia na mali zao katika kila kona ya jamhuri.
Kusambaa huku kwa machafuko kulileta mshtuko mkubwa na wa ghafla kwa Watanzania, hususan wanachama wa CCM, kwani matukio ya namna hiyo yenye kusababisha taharuki na upotevu wa maisha hayajawahi kushuhudiwa katika historia ndefu ya nchi inayofahamika kama kisiwa cha utulivu.
Katika mahojiano maalum kupitia moja ya vyombo vya habari nchini Tanzania, Dkt. Migiro alifafanua kuwa chama kilihitaji muda wa kutosha kutafakari kwa kina mzizi wa kadhia hiyo, kikiunga mkono na kupitia kwa umakini ripoti ya Tume ya Uchunguzi iliyoongozwa na Jaji Othman Chande ambayo ilifanikishwa kwa kiasi kikubwa na wananchi waliojitokeza kutoa ushahidi wao kwa weledi.
Msimamo wa CCM hivi sasa unalenga kuona kuwa mapendekezo ya tume hiyo yanafanyiwa kazi ili kuhakikisha kuwa maafa kama hayo hayajirudii tena nchini kamwe, hasa kwa kuzingatia kuwa ripoti hiyo ilibaini uwepo wa vifo vya takribani watu 518 pamoja na majeruhi wengi.
Dkt. Migiro alihitimisha kwa kueleza kuwa chama hakina shaka na takwimu hizo zilizokusanywa kutoka vyanzo rasmi vya serikali na hospitali binafsi, kwani kwa CCM uhai wa mwananchi hata mmoja una thamani kubwa isiyoweza kupimwa kwa namba, hivyo kuna haja ya kuendelea kuchunguza mazingira yote yaliyosababisha vifo hivyo ili hatua stahiki zichukuliwe huku taifa likijifunza mbinu bora zaidi za kulinda mshikamano wake wa kudumu.
Social Plugin