Programu ya Taifa ya Kukuza Ujuzi (National Skills Development Programme) inayotekelezwa na Ofisi ya Waziri Mkuu (Kazi, Vijana, Ajira na Wenye Ulemavu) imeendelea kuwa mkombozi wa vijana nchini, ikitajwa kama daraja muhimu lililowaondoa mitaani na kuwapa matumaini mapya.
Katika mahojiano yaliyofanyika mikoa ya Singida, Mwanza na Rukwa, vijana wanaoshiriki mafunzo hayo wameeleza kufurahishwa na fursa hiyo ya kipekee ambayo imewajengea uwezo wa kiufundi na mabadiliko ya kifikra kuelekea soko la ajira linalohitaji nguvukazi yenye ushindani.
Katika kituo cha Pine College kilichopo Kisesa, Mwanza, wanagenzi Mgera Sitta na Zulfa Shamsi, ambao ni sehemu ya kundi la vijana 100 chuoni hapo, wameishukuru serikali kwa kugharamia mafunzo hayo ya miezi nane, ambapo miezi sita ni nadharia darasani na miezi miwili ni kujifunza kwa vitendo.
Hata hivyo, vijana hao wametoa wito kwa serikali kuangalia uwezekano wa kutoa mitaji na vifaa vya kazi (toolkits) baada ya kuhitimu. Wamesisitiza kuwa ujuzi pekee bila nyenzo ya kuanzia kazi unaweza kuchelewesha dhamira yao ya kujiajiri na kutoa ajira kwa vijana wengine.
Dhamira hiyo ya shukrani imeungwa mkono na wanufaika wa fani ya umeme wa majumbani, Salma Rashid na Shams Shakiru, ambao wamebainisha kuwa programu hiyo imewanusuru na madhila ya mitaani ambayo yangeweza kuharibu mustakabali wa maisha yao.
Wameiomba serikali kupanua wigo wa programu hiyo ili kuwafikia vijana wengi zaidi, huku wakisisitiza umuhimu wa kuwasikiliza wahitimu kuhusu hitaji la mitaji ya kuanzia.
Serikali ilizindua awamu ya nane ya programu hiyo Machi 3 mwaka huu na kusema ni mkakati thabiti wa serikali kuelekea Dira ya Taifa ya Maendeleo ya 2050, ikilenga kufikia vijana 5,746 nchi nzima kupitia vyuo 46 katika mikoa 25 ya Tanzania Bara.
Takwimu zinaonyesha ushiriki wa vijana wa kike 2,391 na wa kiume 3,355, huku kundi la vijana wenye ulemavu 60 likijumuishwa kwa kuzingatia falsafa ya kutomwacha kijana yeyote nyuma.
Uzinduzi wa awamu hii ya nane unakuja wakati ambapo nchi inajipanga kuelekea Dira ya Taifa ya Maendeleo ya 2050, ikihitaji nguvukazi yenye ushindani wa kimataifa.
Katika awamu hii ya nane, serikali imewekeza rasilimali nyingi kuwafikia vijana 5,746 nchi nzima.
Social Plugin