Chama cha Ukombozi wa Umma (CHAUMMA) kimetoa msimamo wake kuhusu matukio ya vurugu yaliyotokea wakati na baada ya Uchaguzi Mkuu wa Oktoba 29, 2025, kikitaja kuwa kauli za uchochezi zilizolenga kuzuia mchakato wa uchaguzi ndizo zilizosababisha uharibifu wa mali na upotevu wa maisha.
Hatua hiyo imekuja wakati taifa likiwa katika mchakato wa kuponya majeraha ya kisiasa kupitia Tume Huru ya Kuchunguza Matukio hayo iliyoundwa na Rais Dkt. Samia Suluhu Hassan.
Akizungumza katika kipindi cha ‘Jambo Asubuhi’ kupitia Jambo TV , Machi 26, 2026, Naibu Katibu Mkuu wa CHAUMMA Tanzania Bara, Benson Kigaila, amebainisha kuwa vurugu hizo hazikutokea kwa bahati mbaya bali zilitokana na mfululizo wa kauli kutoka kwa watu waliokuwa na nia ya kuvuruga amani ya nchi. Ingawa Kigaila hakuwa tayari kutaja majina ya wahusika, alisisitiza kuwa nyendo zao zinafahamika na Watanzania wengi waliofuatilia mchakato huo wa kidemokrasia.
Kuhusu ukimya wa chama hicho katika kutoa matamko ya awali ya kulaani vurugu hizo, Kigaila amefafanua kuwa CHAUMMA ina utaratibu wa kutofanya maamuzi ya kukurupuka. Alieleza kuwa msingi wa chama chao ni kufanya uchambuzi wa kina kabla ya kutoa msimamo rasmi, jambo ambalo limewafanya kusubiri muda muafaka ili kutoa kauli yenye mashiko na inayojenga badala ya kuongeza taharuki.
Kwa sasa, macho na masikio ya chama hicho yameelekezwa kwenye ripoti ya Tume ya Jaji Mkuu Mstaafu, Mohamed Chande Othman, ambayo inatarajiwa kutoa mwanga wa kile kilichojiri na kupendekeza njia za kuelekea maridhiano ya kweli. Kigaila ameweka wazi kuwa mara baada ya ripoti hiyo kuwekwa hadharani, CHAUMMA itapata fursa pana ya kuichambua kitaalamu na kutoa mtazamo wao rasmi utakaosaidia kuimarisha umoja wa kitaifa.
Msimamo huu wa CHAUMMA unaonesha umuhimu wa taasisi za kisiasa kuheshimu michakato ya kisheria na kutoa nafasi kwa vyombo vilivyoundwa kikatiba kufanya kazi yake. Ni ishara kuwa licha ya tofauti za kimtazamo zilizojitokeza wakati wa uchaguzi, bado kuna fursa ya mazungumzo na uchambuzi wa kina utakaolifikisha taifa kwenye utulivu wa kudumu na mshikamano wa kijamii.
Naibu Katibu Mkuu huyo pia amedai kuwa chama hicho kinaweza kushika nafasi ya pili kwa kuwa na idadi kubwa ya wanachama na wafuasi baada ya chama tawala (CCM), ingawa katika matokeo ya Uchaguzi Mkuu uliopita wamepata Viti vichache vya Ubunge na Udiwani ukilinganisha na CCM na ACT Wazalendo.
Kigaila amesema viongozi wa chama hicho hawatakuwa mstari wa mbele 'kupiga kelele mitandaoni' kama wengi wanavyodhani, badala yake watajikita kuhakikisha wanawafikia Watanzania na kukinadi chama hicho, hiyo ikienda sambamba na kutoa elimu kwa umma kuhusu umuhimu wa 'kupigania' Taifa.
Social Plugin