Dodoma, Novemba 5, 2025
Rais wa Jamhuri ya Muungano wa Tanzania, Mhe. Dkt. Samia Suluhu Hassan, amemuapisha Bw. Hamza Said Johari kuwa Mwanasheria Mkuu wa Serikali (AG) katika hafla fupi iliyofanyika leo Ikulu Chamwino, mkoani Dodoma.
Hafla hiyo imehudhuriwa na viongozi mbalimbali wa Serikali akiwemo Waziri Mkuu, Kassim Majaliwa, Jaji Mkuu wa Tanzania, Mhe. George Masaju, pamoja na viongozi wa vyombo vya ulinzi na usalama.
Hamza Said Johari anachukua nafasi hiyo muhimu ya kikatiba yenye jukumu la kutoa ushauri wa kisheria kwa Serikali, kusimamia utekelezaji wa sheria, na kuhakikisha masuala yote ya kisheria yanayohusu maslahi ya Taifa yanaendeshwa kwa ufanisi.
Rais Samia katika hotuba yake fupi baada ya kuapishwa kwa Mwanasheria Mkuu huyo, alisisitiza umuhimu wa utendaji wa haki, uwajibikaji, na uadilifu katika kusimamia masuala ya kisheria, akibainisha kuwa Serikali inaendelea kuimarisha taasisi zake ili kulinda misingi ya utawala bora na haki za wananchi.
Kwa upande wake, Bw. Johari ameahidi kutekeleza majukumu yake kwa uadilifu na weledi, akisema ataendelea kushirikiana kwa karibu na taasisi zote za kisheria katika kukuza utawala wa sheria nchini.
Uapisho huo umefuatia uteuzi uliofanywa na Rais Samia hivi karibuni, ikiwa ni sehemu ya maboresho katika Sekretarieti ya Serikali yanayolenga kuongeza ufanisi na kuimarisha utendaji katika sekta ya sheria na haki.
Social Plugin