Na Dotto Kwilasa, DODOMA
Mkurugenzi Mkuu wa Shirika la Reli Tanzania (TRC), Mhandisi Masanja Kadogosa, amesema kuwa ujenzi wa reli ya kisasa (SGR) unaendelea vizuri, huku lengo likiwa ni kuhakikisha huduma za reli zinafika kwa Watanzania wote.
Kadogosa amezungumza hayo Bungeni Jijini Dodoma Mei 15,2025 na Waandishi wa habari ambapo ameeleza kuwa hatua hiyo inalenga kuboresha huduma kwa wananchi na kupunguza msongamano katika vituo vya treni hasa nyakati za wikendi.
“Kwa sasa tuko katika hatua nzuri sana kutokana na ongezeko kubwa la abiria, tunapanga kuongeza idadi ya safari za treni kati ya Dar es Salaam na Dodoma, hasa kuanzia Ijumaa hadi Jumatatu ambapo wateja huwa wengi sana,” amesema Mhandisi Kadogosa.
“Tunatambua kuwa wananchi wamekuwa na mwitikio mkubwa kwa usafiri wa reli kutokana na unafuu wake, usalama na uhakika wa muda. Hivyo ni wajibu wetu kuboresha huduma kwa kuongeza mizunguko ya treni ili kukidhi mahitaji haya,” ameongeza.
Aidha, Kadogosa amesema kuwa TRC inaendelea na maandalizi ya kuongeza uwezo wa miundombinu ya stesheni, huduma za tiketi na mfumo wa usimamizi wa abiria ili kuhakikisha safari zinakuwa za kisasa na zenye ufanisi. Alisema kuwa shirika hilo linajivunia mchango wake katika kukuza uchumi wa ndani kwa kuunganisha mikoa na kurahisisha biashara na usafiri wa watu.
Social Plugin