Kamishna Jenerali wa Mamlaka ya Kudhibiti na Kupambana na Dawa za Kulevya (DCEA) Aretas Lyimo
TAARIFA KWA UMMA
UKAMATAJI WA DAWA ZA KULEVYA KATIKA MIKOA YA DAR ES SALAAM,
PWANI, KILIMANJARO NA ARUSHA
Dar es Salaam, 19 Juni, 2023:
Mamlaka ya Kudhibiti na Kupambana na Dawa za Kulevya (DCEA) kwa kushirikiana na
Vyombo vingine vya Ulinzi na Usalama imefanya operesheni katika mikoa ya Dar es
Salaam, Pwani, Kilimanjaro na Arusha na kufanikiwa kukamata dawa za kulevya aina ya
heroin kilogramu 200.5, bangi kavu iliyokuwa tayari kusafirishwa gunia 978, bangi mbichi
gunia 5,465, bangi iliyosindikwa (skanka) kilogramu 1.5, methamphetamine gramu 531.43,
heroin kete 3,878, cocaine kete 138, mililita 3,840 za dawa tiba zenye asili ya kulevya aina
ya Pethidine pamoja na kuteketeza ekari 1,093 za mashamba ya bangi.
Aidha, kwa
kushirikiana na Bodi ya Kimataifa ya Kudhibiti Dawa za Kulevya (INCB) Mamlaka imezuia
kuingia nchini jumla ya kilogramu 1,507.46 za kemikali bashirifu ambazo zingeweza
kutumika kutengenezea dawa za kulevya.
Ukamataji huo uliofanyika kuanzia tarehe 25 Machi, 2023 hadi tarehe 19 Juni, 2023
unahusisha watuhumiwa 109 wakiwemo raia watatu wa kigeni.
Baadhi ya watuhumiwa
wamefikishwa mahakamani na wengine wanatarajiwa kufikishwa mahakamani taratibu za
kisheria zitakapokamilika.
Kutokana na udhibiti kuwa mkubwa, wafanyabiashara wa dawa za kulevya wameendelea
kubuni mbinu mpya za usafirishaji wa dawa za kulevya ili kukwepa kukamatwa.
Mamlaka
imebaini mbinu hizo na kuchukua hatua. Mbinu mojawapo inayotumika ni raia wa kigeni kuanzisha mahusiano ya kimapenzi na wanawake wa kitanzania zaidi ya mmoja na kuficha
dawa za kulevya kwenye makazi ya wanawake hao huku wao wakipanga nyumba tofauti na
wanakoishi wapenzi wao.
Hali hii husababisha wanawake wa kitanzania kuingia kwenye
matatizo makubwa ya kukamatwa na kuchukuliwa hatua za kisheria huku wanaume
wakiwakana wanawake hao.
Mamlaka ya Kudhibiti na Kupambana na Dawa za Kulevya, imejipanga kikamilifu
kupambana na biashara ya dawa za kulevya.
Hivyo, wote wanaojihusisha au wenye mpango
wa kujihusisha na biashara hiyo, waache mara moja au wajisalimishe wenyewe kabla
hawajafikiwa na mkono wa sheria.
Pia, wananchi wanapaswa kuwa makini na mizigo wanayopewa kubeba au kuhifadhi pasipo
kujua ndani yake kuna nini.
Wanawake wanatakiwa kuwa makini zaidi kwani katika baadhi
ya matukio, wamekuwa wakitumiwa na wapenzi wao hasa raia wa kigeni kusafirisha na
kupokea mizigo wasiyoijua na wakati mwingine mizigo hiyo huwa na dawa za kulevya na
hivyo hujikuta matatani.
Kifungu cha 15 cha Sheria ya Kudhibiti na Kupambana na Dawa za Kulevya kinaeleza
kwamba, ni kosa kusafirisha dawa za kulevya, na mtu yoyote akithibitika kutenda kosa hilo
atawajibishwa kisheria ikiwa ni pamoja na kifungo kisichopungua miaka 30 au kifungo cha
maisha gerezani.
Serikali imejipanga ipasavyo kuhakikisha inamaliza tatizo la dawa za kulevya kwa ustawi wa
jamii. Kutokana na kuwepo madhara makubwa ya kiuchumi, kijamii na kisaikolojia
yanayotokana na matumizi ya dawa za kulevya, ni vema wananchi kuendelea kutoa
ushirikiano kwa Serikali kwa kuwafichua wote wanaojihusisha na matumizi na biashara ya
dawa za kulevya ili kwa pamoja tuweze kulikomboa taifa kutoka katika janga hili.
Aidha, katika kuhakikisha biashara na matumizi ya dawa za kulevya yanatokomea nchini,
Mamlaka imejikita katika utoaji wa elimu juu ya tatizo la dawa za kulevya kwa jamii.
Ili
kupanua wigo wa utoaji elimu, Mamlaka imeingia makubaliano na Taasisi ya Kuzuia na
Kupambana na Rushwa (TAKUKURU) kutumia klabu zao zilizokwisha anzishwa kwenye
3
shule na vyuo kutoa elimu juu ya tatizo la dawa za kulevya.
Hivyo, elimu ya kupambana na
rushwa na dawa za kulevya itatolewa kupitia klabu hizo.
Vilevile, Mamlaka ya Kudhibiti na Kupambana na Dawa za Kulevya inawataarifu watu wote
kuwa, tarehe 26 Juni kila mwaka, Tanzania huungana na Mataifa mengine kuadhimisha Siku
ya Kimataifa ya Kupiga Vita Dawa za Kulevya Duniani kwa lengo la kuongeza uelewa wa
jamii na kuhamasisha Umma kushiriki katika mapambano dhidi ya matumizi na biashara ya
dawa za kulevya.
Maadhimisho haya kwa mwaka huu kitaifa, yatafanyika tarehe 23 Juni, hadi tarehe 25 Juni,
2023 jijini Arusha katika uwanja wa Sheikh Amri Abeid. Maadhimisho haya yataambatana
na maonesho ya shughuli mbalimbali za udhibiti zinazofanywa na Mamlaka pamoja na
wadau wake katika udhibiti wa dawa za kulevya na utoaji elimu kuhusu tatizo la dawa za
kulevya.
Mgeni rasmi siku ya kilele tarehe 25 Juni, 2023 ni Rais wa Jamhuri ya Muungano wa
Tanzania Mhe. Dkt. Samia Suluhu Hassan. Kauli mbiu ya maadhimisho haya ni
“Tuzingatie Utu na Kuboresha Huduma za Kinga na Tiba”.
Wananchi wote hususani
wakazi wa Arusha na mikoa ya jirani mnakaribishwa kushiriki katika maadhimisho hayo.
Imetolewa na,
Kitengo cha Mawasiliano Serikalini
MAMLAKA YA KUDHIBITI NA KUPAMBANA
NA DAWA ZA KULEVYA.
.jpeg)
