AWACHOMA KISU WATOTO BAADA YA MKE WAKE KUOLEWA NA NJEMBA NYINGINE GEITA | MALUNDE 1 BLOG

Thursday, February 11, 2021

AWACHOMA KISU WATOTO BAADA YA MKE WAKE KUOLEWA NA NJEMBA NYINGINE GEITA

  Malunde       Thursday, February 11, 2021


na ALPHONCE KABILONDO - nipashe

JACKSON Bahati (27), mkazi wa kijiji cha Buhangizi, Kata ya Kagu, mkoani Geita, anadaiwa kuwajeruhi watoto wake wawili kwa kuwachoma kisu maeneo ya tumboni baada ya kwenda kijiji jirani na kumkuta mke wake ameolewa na mwanamume mwingine.

Kaimu Kamanda wa Polisi Mkoa wa Geita, Kamishna Msaidizi (ACP) Dismas Kisusi, akithibitisha jana tukio hilo amesema kuwa tukio lilitokea majira ya saa 9:00 usiku Januari 27, mwaka huu.

Alisema baada ya kutenda kitendo hicho, mtuhumiwa naye alijichoma kisu mara nne kwenye tumbo lake na kisha kunywa sumu ya panya kwa lengo la kujiua.

Kamanda Kisusi aliwataja watoto waliojeruhiwa kuwa ni Leah Jackson (4) na Bahati Jackson (3) ambao wote walichomwa kisu maeneo ya tumboni na baada ya kutokea kwa tukio hilo, walipata msaada kutoka kwa raia wema na kupelekwa Hospitali ya Nzera na hadi sasa hali zao zinaendelea vizuri.

Kisusi alisema mtuhumiwa huyo akiwa chini ya ulinzi wa polisi, aliwahishwa na askari katika Hospitali ya Nzera na baadaye kuhamishiwa katika Hospitali ya Wilaya Sengerema mkoani Mwanza ambako mpaka sasa anaendelea kushikiliwa na polisi ili sheria ichukue mkondo wake.

"Chanzo cha tukio hilo ni mgogoro wa kifamilia ikiwa ni baada ya mama watoto, ambaye ni mke wa mtuhumiwa kutoroka nyumbani kwake na kuacha watoto hao na kwenda kusikojulikana. Baada ya baba watoto kumtafuta bila mafanikio ndipo akachukua uamuzi huo,” alisema.

Ofisa Maendeleo ya Jamii Mkoa wa Geita, Last Lingson, alisema ili kuzuia matukio ya aina hiyo yanayotokana na usaliti na migogoro ndani ya familia, ni vyema wanandoa wajaribu kuangalia namna ya kuzuia viashiria hatarishi vinavyoweza kusababisha usaliti ndani ya ndoa.

Last aliwashauri watu ambao wako kwenye maumivu yanayotokana na migogoro ya ndoa kuwashirikisha wanasaikolojia au marafiki wa karibu mapema ili kuepuka kuchukua uamuzi unaoweza kuwagharimu ikiwamo kujiua na kufanya vitendo vya ukatili kwa ndugu zao wa karibu.

Usikubali kupitwa na habari..Pakua App ya Malunde1 blog HAPA Ili tuwe tunakutumia habari moja kwa moja Kwenye Simu yako
logoblog

Kama Una Habari,Picha,Video,Tangazo n.k Wasiliana Nasi Simu/WhatsApp +255 757 478 553 ,0625 918 527

Malunde 1 blog Ipo PlayStore....Pakua App yetu mpya HAPA Upate Habari Mpya Moja Kwa Moja Kwenye Simu yako..Utasoma habari hata kama hauna MB..Bofya Hapa
https://play.google.com/store/apps/details?id=com.malunde.blog
Previous
« Prev Post