Wakizungumza wakati wa ziara ya Waziri wa Ujenzi, Abdallah Ulega wilayani Kishapu, wananchi hao walisema barabara hiyo imekuwa kikwazo kwa ukuaji wa shughuli za kiuchumi, hasa kwa wafanyabiashara pamoja na utoaji wa huduma za kijamii, hali inayosababisha kudorora kwa maendeleo katika eneo hilo.
Wamesema endapo barabara hiyo itajengwa kwa kiwango cha lami, itarahisisha usafirishaji wa bidhaa, kukuza biashara kwa kasi, pamoja na kuboresha upatikanaji wa huduma muhimu za kijamii ikiwemo huduma za afya kwa wananchi.
Akiwasilisha taarifa yake, Meneja wa Tanzania National Roads Agency (TANROADS) Mkoa wa Shinyanga, Mhandisi Ntuli Mwaikokesya alisema barabara hiyo ina urefu wa kilomita 53.6 na kwamba hatua za awali za maandalizi ya ujenzi tayari zimekamilika, huku wakisubiri idhini ya kuanza mchakato wa kumpata mkandarasi ili ujenzi wa kiwango cha lami uanze.
Alisema usanifu wa barabara hiyo ulikamilika mwaka 2017 na tangu wakati huo serikali imeendelea kutoa fedha kwa ajili ya matengenezo. Alibainisha kuwa katika mwaka huu wa fedha, kiasi cha shilingi milioni 413 kimetengwa kwa ajili ya kuendelea na matengenezo ya barabara hiyo.
“Baada ya usanifu kukamilika, tunasubiri kibali cha kutangaza zabuni ya ujenzi kwa kiwango cha lami. Barabara hii ni muhimu kwa sababu inaunganisha mikoa ya Shinyanga Region, Simiyu Region na Arusha Region kupitia Karatu,” alisema Mwaikokesya.
Kwa upande wake, Waziri wa Ujenzi Abdallah Ulega aliwaahidi wananchi wa Kishapu kuwa serikali kupitia bajeti ya mwaka wa fedha 2026/2027 itatenga fedha kwa ajili ya ujenzi wa barabara hiyo ili kufungua fursa mbalimbali za kiuchumi na kijamii kwa wananchi wa eneo hilo.
“Nimekagua barabara hii kutoka Kolandoto hadi Mangongo kupitia Mhunze yenye urefu wa kilomita 53.6. Kazi hii nitaifanya. Tutaiweka kwenye bajeti, tupate kibali, mkandarasi na fedha ili ujenzi wa kiwango cha lami uanze,” alisema Ulega.
Katika hatua nyingine, Waziri Ulega alikagua mradi wa maboresho ya uwanja wa ndege wa Ibadakuli uliopo katika Manispaa ya Shinyanga na kuwataka wakandarasi wanaotekeleza mradi huo kuongeza kasi ya ujenzi ili ukamilike kwa wakati.
Alisema mradi huo unatarajiwa kukamilika ifikapo Aprili 30 mwaka huu na kwa sasa umefikia asilimia 94.9 ya utekelezaji. Hivyo aliwataka wakandarasi kuongeza idadi ya wafanyakazi, vifaa pamoja na masaa ya kazi ili kuhakikisha mradi unakamilika kwa wakati uliopangwa.
“Kule wamebakiza siku 45 tu kumaliza mradi huu na hatutaongeza hata siku moja. Fanyeni kazi usiku na mchana ili wananchi waanze kutumia uwanja huu mapema,” alisisitiza Ulega.
Katika ziara hiyo, Waziri Ulega alikagua maendeleo ya uwanja wa ndege wa Ibadakuli pamoja na barabara ya Kolandoto–Mhunze–Mangongo ambayo inaunganisha mikoa ya Shinyanga, Simiyu na Arusha kupitia wilaya ya Karatu.
Social Plugin