Serikali imefanya uwekezaji mkubwa wa Shilingi trilioni 1.154 katika miradi ya kimkakati ya uendelezaji wa viwanja vya ndege nchini kati ya mwaka 2022 na 2025.
Lengo kuu la uwekezaji huu ni kuongeza uwezo wa viwanja kuhudumia ndege kubwa, abiria, na mizigo huku kipaumbele kikiwa ni usalama wa anga. Miundombinu hii imeboreshwa ili kukidhi viwango vya kimataifa vya usalama na ulinzi.
Katika kuimarisha ulinzi, Serikali imezindua matumizi ya mashine za kisasa 13 za ukaguzi wa abiria na mizigo. Mashine hizi zimefungwa katika viwanja vya JNIA, Kigoma, Shinyanga, Tanga, Lake Manyara, na Iringa. Hatua hii imepunguza mianya ya usalama na kuruhusu baadhi ya viwanja kuanza kutoa huduma saa 24.
"Ufanisi huu umeleta matokeo chanya, ambapo Uwanja wa Ndege wa Kimataifa wa Julius Nyerere (JNIA) na ule wa Kilimanjaro (KIA) vimetambuliwa kimataifa. Viwanja hivi vimepata tuzo za ubora na usalama, jambo linaloiweka Tanzania katika ramani ya nchi zenye anga salama duniani. Hali hii imeongeza imani kwa mashirika makubwa ya ndege ya kimataifa." alisema Msemaji Mkuu wa serikali Gerson Msigwa akizungumza na wandishi wa habari Dar es Salaam Februari 26 mwaka huu.
Alisema mazingira haya salama yamevutia mashirika mapya saba ya kimataifa kuanza safari zake nchini Tanzania. Mashirika hayo aliyataka kuwa pamoja na Air France, Saudia, South African Airways, na Zambia Airways. Ongezeko hili limeleta ushindani wa kibiashara na kurahisisha safari za kimataifa kwa wananchi na wafanyabiashara.
Takwimu za uendeshaji zinaonyesha kuwa safari za ndege zimeongezeka kwa asilimia 10 katika nusu ya mwaka wa 2025 ikilinganishwa na mwaka uliotangulia. Idadi ya abiria imepanda kwa asilimia 9 katika kipindi hicho cha nusu mwaka. Ongezeko hili ni kiashiria tosha cha kuimarika kwa imani ya wasafiri kutokana na usalama uliopo.
Pia, Serikali inaendelea na miradi ya uwekaji taa za kuongozea ndege (AGL) katika viwanja kama Arusha na Tabora. Miradi hii inalenga kuwezesha ndege kutua na kuruka wakati wa usiku na hali mbaya ya hewa. Hii ni hatua muhimu katika kufanya sekta ya anga kuwa ya kisasa na yenye ufanisi.
Uwekezaji huu wa kudumu unahakikisha kuwa sekta ya usafiri wa anga inachangia ipasavyo katika Pato la Taifa. Serikali imedhamiria kuendeleza viwanja vingine vilivyo chini ya Mamlaka ya Viwanja vya Ndege (TAA). Kupitia usalama huu, Tanzania inatarajia kuwa kitovu kikuu cha usafiri wa anga Afrika Mashariki.
Social Plugin