KATIKA kile kinachoonekana kama mapinduzi ya kimkakati ya kuwapa vijana wa Tanzania mamlaka kamili juu ya hatma yao, uamuzi wa Rais Samia Suluhu Hassan wa kuunda Wizara ya Maendeleo ya Vijana mnamo Novemba 17, 2025, umepokelewa kama "mwanga wa alfajiri" kwa nguvu kazi ya taifa.
Hii si wizara nyingine tu ya serikali; ni "pa kusemea" ambapo kila kijana sasa ana anwani ya kudumu ya kutatua changamoto zake.
Safari hii iliyoanza kwa Dk. Joel Nanauka kupewa rungu la kuiongoza wizara hiyo chini ya Ofisi ya Rais, inakuja wakati muafaka ambapo takwimu za Sensa ya 2022 zinaonesha kuwa asilimia 34.5 ya Watanzania ni vijana.
Hii inamaanisha kuwa kundi hili si tu rasilimali, bali ni injini kuu ya uchumi wa kidijitali na mabadiliko ya kijamii ambayo serikali sasa imeamua kuishughulikia kwa kuinyofoa kutoka kwenye mwavuli wa wizara ya kazi na ajira.
"Vijana wamekuwa wakiimbwa kila siku kuwa ndio taifa la kesho, sasa kwa nini kama ni taifa la kesho lilikuwa halina mtu wa kulisemea?" anahoji Benard Nakulinga, mkazi wa Nyegezi, Mwanza. Maoni haya yanawakilisha nia safi ya serikali; kuondoa urasimu ambapo kijana alilazimika kupita milango mingi kueleza changamoto zake. Sasa, kuna wizara mahususi ambayo itaratibu sera, ujuzi unaoendana na soko la ajira, na muhimu zaidi, uwezeshaji wa kiuchumi kupitia mikopo na mitaji.
Katika ulimwengu huu wa uchumi wa kidijitali, wizara hii inatazamwa kama kitovu cha kukuza ujasiriamali wa mtandaoni, ubunifu wa maudhui, na matumizi ya teknolojia katika sekta za kilimo na madini. Hii ni fursa kwa vijana kutoichukulia poa hatua hii, kwani ndiyo inayokwenda kurekebisha changamoto za mitaji ambazo mjasiriamali kama Ricardo William wa Ilemela amekuwa akizilalamikia, akisisitiza kuwa vijana wakitengenezewa mazingira mazuri, "hawana kelele" bali wanafanya kazi.
Maono ya kuanzishwa kwa wizara hii yanaenda mbali zaidi ya kutoa mikopo tu. Inalenga kufanya "sensa ya kitaaluma" ili kutambua wahitimu waliko na kuwaunganisha na fursa kulingana na kile walichosomea. Hii ni safari inayowataka vijana kujiamini na kutumia jukwaa hili jipya kudai nafasi yao katika ujenzi wa taifa. Kama anavyosema mchimbaji mdogo Godfrey Kiswene kutoka vijijini, kilio cha vifaa na mitaji sasa kina mahali pa kufikishwa. Safari ndio kwanza imeanza, na kila kijana anapaswa kuwa sehemu ya injini hii ya mabadiliko.
Social Plugin