AMANI NI MTAJI WA UCHUMI: JINSI UTULIVU UNAVYOWAINUA MAMA LISHE NA WAJASIRIAMALI WADOGO

Inapozungumzwa thamani ya amani ya Tanzania watu wengi hutazama utulivu wa kisiasa pekee lakini picha halisi ya kiuchumi inajidhihirisha katika mifuko ya wananchi wa hali ya chini ambao wanatumia fursa za sherehe kujipatia kipato cha uhakika.

Katika msimu huu wa kuamkia mwaka mpya wa 2026 amani imekuwa mtaji mkuu kwa maelfu ya mama lishe wauzaji wa vinywaji wasafirishaji wa abiria na vijana wanaojishughulisha na biashara ndogondogo katika maeneo ya mikusanyiko kama Coco Beach, Nyerere Square na viwanja mbalimbali vya michezo mikoani vilivyotumika wakati kufanya burudani. 

Utulivu huu umewapa wananchi ujasiri wa kutoka majumbani mwao saa za usiku na kutumia fedha zao kwa ajili ya starehe jambo ambalo limesababisha mzunguko mkubwa wa fedha na kuimarisha uchumi wa mtu mmoja mmoja ambao ndio msingi wa ustawi wa taifa.

Uchambuzi wa kiuchumi unaonyesha kuwa amani inatengeneza mazingira yanayotabirika kwa wafanyabiashara ambapo mjasiriamali mdogo anaweza kuwekeza fedha zake kununua bidhaa akijua kuwa hakutakuwa na vurugu zitakazosababisha hasara au uharibifu wa mali zake. 

Wakati wa sherehe hizi za mwaka mpya tumeona jinsi amani ilivyosaidia biashara za huduma kama vile wapiga picha wasusi wa nywele na wauzaji wa bidhaa za urembo kupata wateja wengi kutokana na watu kuwa na utulivu wa nafsi na hamu ya kusherehekea. 

Hii ni dhihirisho tosha kuwa chokochoko za maandamano na vurugu za kisiasa ni adui mkubwa wa mwananchi maskini kwani machafuko yanapotokea watu wa kwanza kuumia ni wale wanaotegemea kipato cha kila siku ili kuendesha maisha yao na kusomesha watoto wao.

Serikali ya awamu ya sita imeendelea kuweka mazingira wezesha kwa kuhakikisha usalama wa raia na mali zao unakuwepo wakati wote jambo ambalo linawapa moyo wawekezaji wa ndani na nje kuendelea kukuza biashara zao. 

Kupitia amani hii tumeshuhudia ongezeko la fursa za ajira za muda kwa vijana wengi ambao wamejishughulisha na utoaji wa huduma mbalimbali za burudani na usafi katika maeneo ya sherehe hivyo kupunguza makali ya maisha na kukuza nguvu ya ununuzi katika jamii. 

Wananchi waliofurika mitaani wameonyesha kwa vitendo kuwa wanachohitaji ni amani ili waweze kutafuta riziki zao kwa uhuru na usalama huku wakidharau kauli za uchochezi zinazolenga kuvuruga utaratibu huo wa kiuchumi uliokaa vizuri.

Ni vyema ikaeleweka kuwa kila shilingi inayopatikana kupitia mzunguko wa kibiashara wakati wa amani inachangia katika kukuza pato la taifa na kuimarisha miundombinu ya kijamii tunayojivunia leo. Kwa kulinda amani, watanzania wanakuwa wanalinda masoko yao wanalinda ajira zao na wanalinda mustakabali wa biashara zao kuanzia ngazi ya chini kabisa hadi kwa wafanyabiashara wakubwa. 

Hakika utulivu wa mwaka mpya wa elfu mbili ishirini na tano umekuwa ni somo kwa wote kuwa amani ni tunda tamu ambalo kila mwananchi anapaswa kulilinda kwa wivu mkubwa kwani ndio msingi pekee wa maendeleo ya kweli ya kiuchumi na kijamii nchini Tanzania.