UZALENDO WA VITENDO: VIJANA WAPONGEZWA KWA KUKATAA UCHOCHEZI NA KULINDA UTULIVU WA TAIFA

Wakati Tanzania ikiendelea kutulia baada ya kumalizika kwa Uchaguzi Mkuu wa Oktoba 29, 2025, sauti za wananchi kutoka sehemu mbalimbali zimeendelea kusisitiza kuwa amani ndiyo utambulisho mkuu wa nchi. 

Victoria Kavishe, mkazi wa Dar es Salaam, ametoa pongezi kwa Watanzania kwa kuendelea kulinda amani na upendo, akisema kuwa utulivu ndio unaowawezesha watu kufanya kazi, kusafiri, na kulea familia bila hofu yoyote. Kavishe amewasihi wananchi kutoshiriki katika vitendo vinavyoweza kusababisha mpasuko au machafuko nchini.

Mtazamo huo unaungwa mkono na Amina Jamal, ambaye anaeleza kuwa amani inapodumishwa, fursa za kiuchumi huongezeka na taifa hupiga hatua kwa kasi kubwa. 

Amina anahimiza kila Mtanzania kuepuka vurugu na migawanyiko, akisisitiza kuwa ulinzi wa amani ni wajibu wa kila mmoja kwa ajili ya vizazi vya sasa na vijavyo. Aliongeza kuwa ni muhimu kujenga tabia ya kuheshimiana na kusikilizana ili kutatua tofauti kupitia mazungumzo badala ya mizozo.

Licha ya kuwepo kwa changamoto za kisiasa, baadhi ya vijana wameeleza kuwa mzalendo wa kweli hupimwa kwa vitendo na si maneno pekee. Wamesisitiza kuwa kwa kuchagua utulivu badala ya kelele za chuki na propaganda, wamethibitisha kuwa nguzo ya amani ya taifa imara. 

Aidha vijana nchini wametakiwa kujiamini na kujitokeza kwa wingi katika kuwania fursa zilizopo nchini kwa kuhakikisha kwamba amani inaendelea kuwepo ili katika mazingira ya sasa ya ushindani na ukuaji wa uchumi, kuwepo na mazingira rafiki yatakayowafanya vijana kuonyesha vipaji vyao na uwezo wao katika ubunifu, utekelezaji, usimamizi na uongozi.