Hili ni jibu la mfano wa swali lako

Malunde Blog ni nini?

Malunde 1 Blog ni blog maarufu ya Tanzania inayochapisha habari, burudani na matukio ya kila siku.

Nawezaje kuwasiliana na Malunde Blog?

Unaweza kututumia ujumbe kupitia ukurasa wa mawasiliano au kutuandikia kupitia mitandao ya kijamii ya @malundeblog.

Malunde 1 Blog - Habari za Tanzania,Nyimbo za asili, Utamaduni, Michezo, Burudani na Matukio

Mkuu wa Wilaya ya Shinyanga, Wakili Julius Mtatiro, ameongoza maadhimisho ya siku ya maonyesho ya vipaji na ubunifu kwa wanafunzi ( career fair) chuo kikuu cha ushirika Moshi tawi la Shinyanga Kizumbi( KICoB)

Akizungumza na wanafunzi wa Chuo Cha KICoB Mei 16,2025 katika viwanja vya Chuo hicho Wakili Mtatiro ameeleza kufurahishwa kwake na kiwango cha ubunifu na maarifa yaliyooneshwa na wanafunzi wa KICoB kupitia maonesho ya kazi zao, vipaji vya sanaa, burudani, na ubunifu wa utengenezaji wa bidhaa mbalimbali.

Wakili Mtatiro amesema tukio hilo limethibitisha kuwa vijana wa Tanzania wana uwezo mkubwa ambao unahitaji kuendelezwa kwa dhati ili kuisaidia nchi kufikia malengo yake ya maendeleo endelevu.

Akitambua umuhimu wa malezi ya kizalendo na maendeleo ya vijana kitaifa, Wakili Mtatiro amewahakikishia wanafunzi hao kuwa ataandaa kongamano maalum la vijana, litakalowakutanisha kutoka maeneo mbalimbali ya Mkoa wa Shinyanga, likiwa na lengo la kuwaelimisha juu ya masuala ya uzalendo, ubunifu, ujasiriamali, na uwajibikaji katika jamii.

“Vijana ni hazina ya taifa letu. Tukiwapa mwongozo sahihi katika taaluma na maadili, tutakuwa tumeliwekea taifa msingi imara wa maendeleo. Nitahakikisha tunakuwa na kongamano la vijana litakalowajengea uwezo wa kujitambua, kuwa wabunifu na kuwa raia wema wanaowajibika,” amesema Wakili Mtatiro.

Aidha, ametoa pongezi kwa wakufunzi wa KICoB pamoja na Serikali ya Wanafunzi (MoCUSO) kwa maandalizi mazuri ya tukio hilo muhimu na kuwasihi waendeleze utamaduni huo kila mwaka kwa kuwa unachochea ari ya ubunifu, mshikamano, na kujiamini kwa wanafunzi.

Kwa upande wake, Mkuu wa Chuo hicho, Profesa Isaac Kazungu, amemshukuru mgeni rasmi kwa kutenga muda wake kushiriki tukio hilo muhimu na akaahidi kuendelea kushirikiana na uongozi wa Serikali ya Wanafunzi kuhakikisha Career Day inakuwa sehemu ya kalenda rasmi ya matukio ya chuo. Katika hafla hiyo, washiriki mbalimbali wamepata fursa ya kuonesha vipaji vyao huku washindi wa maonesho na mashindano mbalimbali wakiibuka na zawadi mbalimbali zikiwemo fedha taslimu na zawadi za heshima, kama njia ya kutambua juhudi zao.

Mkuu wa Wilaya ya Shinyanga, Wakili Julius Mtatiro, ameongoza maadhimisho ya Siku ya Career Day katika Taasisi ya Elimu ya Ushirika na Biashara Kizumbi (KICoB)

Mkuu wa Wilaya ya Shinyanga, Wakili Julius Mtatiro, akipongeza kamati ya maandalizi ya Siku ya Career Day katika Taasisi ya Elimu ya Ushirika na Biashara Kizumbi (KICoB)