Mwenyekiti Wa Chama cha Mapinduzi CCM Mkoa wa Ruvuma Oddo Mwisho akizungumza na wananchi wa kata ya Luhangarasi na Upolo wilaya ya Nyasa Mkoani Ruvuma
Baadhi ya wananchi waliojitokeza katika ziara hiyo ya Mwenyekiti wa Chama cha Mapinduzi CCM Mkoa wa Ruvuma wakimsikiliza Mwenyekiti huyo Odo Mwisho pichani hayupo
Baadhi ya wananchi waliojitokeza wakimsikiliza Mwenyekiti wa CCM Mkoa wa Ruvuma Oddo Mwisho pichani hayupo
Mwenyekiti Wa Chama cha Mapinduzi CCM Mkoa wa Ruvuma Oddo Mwisho akikaribishwa kwa kuvishwa skafu katika kata ya Luhangarasi
Na Regina Ndumbaro Nyasa.
Mwenyekiti wa Chama cha Mapinduzi (CCM) Mkoa wa Ruvuma, Oddo Mwisho, amewataka wananchi kushirikiana na viongozi wa chama kupinga vitendo vya rushwa vinavyofanywa na baadhi ya viongozi wanaotaka madaraka kwa njia zisizo halali.
Amelaani tabia ya wagombea kutoa rushwa kwa wananchi ili wapate nafasi za uongozi, akisisitiza kuwa ni jukumu la kila mwananchi kuhakikisha uongozi wa chama unasimamiwa kwa haki na uwazi.
Akizungumza hayo leo Machi 5, 2025, katika kata za Luhangarasi na Upolo, wilaya ya Nyasa, Mkoa wa Ruvuma, Oddo Mwisho ametoa shukrani kwa wananchi baada ya vitongoji vya kata hizo kuibuka na ushindi mnono kupitia CCM.
Amewapongeza kwa mshikamano wao na uamuzi wa kukipa chama hicho ridhaa ya kuendelea kuongoza, akisema ushindi huo ni kielelezo cha imani yao kwa CCM.
Aidha, Mwenyekiti huyo ametoa pongezi maalum kwa viongozi wa kata ya Luhangarasi kwa kushinda uchaguzi katika vitongoji vyote kupitia CCM.
Amewasihi viongozi hao kuendelea kuwa waadilifu na kuhakikisha wanatekeleza majukumu yao kwa uaminifu ili kuendeleza maendeleo kwa wananchi waliowachagua.
Katika hotuba yake, Oddo Mwisho amewahimiza wananchi waendelee kuwa na imani na CCM kwa sababu chama hicho kimekuwa mstari wa mbele katika kutekeleza ilani yake.
Ameeleza kuwa maendeleo mengi yanayoonekana sasa, yakiwemo upatikanaji wa umeme, maji safi na ujenzi wa barabara, ni matokeo ya utekelezaji wa ilani ya CCM chini ya uongozi wa Rais wa Jamhuri ya Muungano wa Tanzania, Dkt. Samia Suluhu Hassan.
Amesisitiza kuwa mshikamano na ushirikiano kati ya wananchi, viongozi wa chama na serikali ni nguzo muhimu kwa maendeleo endelevu.
Ametoa wito kwa wananchi kushirikiana na viongozi wao katika kuhakikisha sera na mipango ya maendeleo ya chama yanafanikiwa ili kuleta ustawi kwa jamii nzima.
Katika ziara hiyo, Oddo Mwisho pia amewapongeza viongozi wa kitaifa wa CCM, akiwemo Rais Dkt. Samia Suluhu Hassan, Ally Hassan Mwinyi na Dkt. Emanuel Nchimbi, kwa kuchaguliwa kuwa wagombea wa urais kupitia chama hicho.
Amesema kuwa uteuzi wao ni kielelezo cha demokrasia na utaratibu mzuri wa ndani wa chama wa kupata viongozi bora.
Mwisho, amewataka wananchi kujitokeza kwa wingi kushiriki katika zoezi la kupiga kura litakalofanyika Oktoba mwaka huu.
Amesisitiza kuwa ni haki ya kila mwananchi kushiriki katika mchakato wa kidemokrasia kwa kuchagua viongozi wanaoendana na matarajio yao ya maendeleo na ustawi wa jamii.
Social Plugin