Na mwandishi wetu,Kigoma
Waziri wa Uchukuzi, Prof. Makame Mbarawa amesema Serikali imetumia shilingi bilioni 51 kuboresha Kiwanja cha Ndege cha Kigoma, huku utekelezaji wa mradi huo ukiwa umefikia asilimia 67 na unatarajiwa kukamilika ifikapo Oktoba au Novemba 2026
Akizungumza baada ya kukagua maendeleo ya mradi huo mkoani Kigoma, leo tarehe 25 Juni, 2026 Prof. Mbarawa amesema jengo jipya la abiria litakuwa na uwezo wa kuhudumia abiria laki nne kwa mwaka na kupokea abiria 500 kwa wakati mmoja, hatua itakayoongeza ufanisi wa huduma za usafiri wa anga katika ukanda huo
Ameongeza kuwa mradi huo utaiwezesha Kigoma kuwa na uwanja wa ndege wenye uwezo wa kutoa huduma mchana na usiku kutokana na uwekaji wa mifumo ya taa za kuongozea ndege
Aidha, amesema Serikali ina mpango wa kuongeza urefu wa njia ya kurukia na kutua ndege ili kuruhusu ndege kubwa zaidi kutumia uwanja huo
Prof. Mbarawa amemshukuru Rais Dkt. Samia Suluhu Hassan kwa kuwezesha kukamilika kwa mradi huo ambao ulikuwa umekwama kwa muda mrefu na kubainisha kuwa viwanja vya ndege vya Shinyanga, Tabora na Sumbawanga tayari vimekamilika
Kwa upande wake, Meneja wa Viwanja vya Ndege Kanda ya Magharibi, Fadhili Magenema, amesema Mamlaka ya Viwanja vya Ndege Tanzania (TAA) itaendelea kusimamia ukamilishaji wa mradi huo na kuboresha huduma za viwanja vya ndege nchini.
Social Plugin