Katika jitihada za kuandaa kizazi chenye uwezo wa kutatua migogoro bila kutumia nguvu, Shirika la Kimataifa la CEFA kutoka nchini Italia limeanzisha mradi kabambe wa kujenga amani unaowahusisha wanafunzi wa shule za sekondari kutoka nchi za Tanzania, Kenya, na Msumbiji.
Mradi huu unalenga kuwajengea vijana uwezo wa kukabiliana na changamoto na migogoro inayochipuka katika jamii zao kupitia mbinu za kisasa za mazungumzo na uvumilivu.
Mtekelezaji Mwenza wa mradi huo, Joyce Mdachi, amebainisha kuwa lengo kuu la programu hiyo ni kuwapa wanafunzi stadi na maarifa yatakayowageuza kuwa mabalozi wa amani badala ya kuwa chimbuko la vurugu.
Mdachi amesisitiza kuwa vijana wanastahili kushirikishwa kikamilifu na kuelimishwa kuhusu umuhimu wa amani, akibainisha kuwa mara nyingi vijana wamekuwa wakitengwa katika michakato ya kutoa maamuzi kuhusu usalama, jambo linalowafanya wahisi kutothaminiwa katika masuala ya amani.
Kwa upande wao, wanafunzi wanaoshiriki katika klabu hizo za amani wameeleza kuwa harakati hizo ni zaidi ya kutafuta utulivu tu, bali ni darasa la kujifunza haki za binadamu na namna ya kuziwasilisha katika mamlaka husika.
Mwanafunzi mmoja kutoka Tanzania alieleza kuwa klabu hizo huandaa michezo, mabonanza, na sanaa mbalimbali kama zana za kutoa elimu kwa jamii juu ya umuhimu wa kuishi kwa kutegemeana na kuheshimiana, huku akisisitiza kuwa klabu hizi zinawafundisha namna bora ya kuishi na wenzao.
Mradi huu, unaohusisha nchi za Ukanda wa Pwani ya Kiswahili, umeweka mkazo mkubwa katika kuzuia migogoro kabla haijatokea (prevention). Walimu na waelimishaji ndani ya mradi huo wanasema kuwa ni rahisi zaidi kumfundisha mtoto kuzuia ugomvi kuliko 'kutibu' jamii iliyoingia katika machafuko.
Klabu hizi za amani zinatengeneza mazingira ambapo watoto wanatambua asili ya amani, jinsi inavyojengwa, na umuhimu wa kuilinda kama msingi wa maisha yao ya baadaye.
Naye mwakilishi kutoka nchini Italia ametoa rai kuwa amani haimaanishi tu kutokuwepo kwa vita vya silaha, bali ni hali ya kutatua migogoro mingi inayojitokeza katika maisha ya kila siku ya mwanadamu. Kupitia hamasa inayotolewa na mradi wa CEFA, vijana hawa sasa wanajengewa ujasiri wa kuwa walinzi wa utulivu katika maeneo yao, wakiamini kuwa amani ya kweli inaanza na mabadiliko ya kifikra ndani ya darasa.
Social Plugin