VIJANA WA KITANZANIA UGHAIBUNI WANAVYOIPANDISHA CHATI NCHI YAO

 Rais wa Jamhuri ya Muungano wa Tanzania, Mhe. Dkt. Samia Suluhu Hassan, amepokea ujumbe wa vijana wa Kitanzania waishio nchini Oman, ambao wameandika historia kwa kutumia rasilimali zao kuitangaza Tanzania katika mataifa tisa tofauti.

Katika hafla iliyofanyika Ikulu Ndogo ya Tunguu, Zanzibar  Januari 22, 2026, Rais Samia amekabidhiwa gari aina ya Jeep Wrangler kutoka kwa kiongozi wa ujumbe huo, Bw. Khalid Al Barwani. Gari hilo ndilo lililotumika kama nyenzo kuu ya usafiri katika safari ndefu ya kishujaa ya kutangaza utalii wa Tanzania.

Ujumbe huo wa vijana wazalendo uliamua kuunga mkono kwa vitendo juhudi za Rais Samia za kuitangaza nchi kupitia filamu ya ‘Tanzania: The Royal Tour’. Katika kuonyesha kuwa utalii ni biashara inayohitaji ubunifu, vijana hao walisafiri na gari hilo wakipita katika nchi za Oman, Saudi Arabia,Sudan, Ethiopia, Kenya, Uganda, Rwanda, na Burundi kabla ya kuingia Tanzania.

Katika nchi hizo, vijana hawa walitumika kama "Mabalozi wa Hiari," wakielezea vivutio vya kipekee vya Tanzania na kuhamasisha raia wa mataifa hayo kuja kuitembelea Tanzania. Hii ni ishara tosha kuwa Diaspora ya Tanzania ni jeshi kubwa katika diplomasia ya uchumi na utalii.

Baada ya kupokea ufunguo wa gari hilo kutoka kwa Bw. Al Barwani, Rais Samia alimkabidhi rasmi Katibu Mkuu wa Wizara ya Maliasili na Utalii, Dkt. Hassan Abbas. Gari hilo sasa litabaki kama alama ya uzalendo na ushindi wa juhudi za pamoja kati ya serikali na raia wake waishio nje ya nchi.

Aidha, tukio hilo limepambwa na uwepo wa Waziri wa Uchukuzi, Mawasiliano na Teknolojia ya Habari wa Oman, Mhe. Saeed bin Hamoud bin Saeed Al Maawali. Maongezi kati yake na Rais Samia yamesisitiza udugu wa kihistoria kati ya Tanzania na Oman, udugu ambao sasa unatafsiriwa katika miradi ya maendeleo, mawasiliano, na utalii.

Hatua hii ya vijana wa Oman inathibitisha kuwa filamu ya The Royal Tour haikuwa tukio la mara moja, bali ni moto uliowashwa na Rais Samia ambao sasa unachochewa na Watanzania wenyewe duniani kote. Kwa kutumia gari hilo kupita mipakani, wameonyesha kuwa Tanzania iko wazi kwa watalii na wawekezaji, na kwamba njia ya kufika Tanzania ni salama na yenye kuvutia.

Huu ni ushindi mwingine kwa sekta ya utalii nchini, huku kukiwa na matumaini makubwa kuwa idadi ya watalii kutoka ukanda wa nchi za Kiarabu na Afrika Mashariki itaongezeka maradufu kutokana na hamasa hii ya kishujaa.