Katika nyakati hizi ambapo ushindani wa kitalii barani Afrika umehamia kwenye medani za kidijitali, nguvu ya vijana wa Kitanzania ndiyo imekuwa silaha kuu ya kulinda rasilimali na heshima ya nchi.
Wakati mataifa jirani yanayoshindana nasi yakitumia mbinu za kupika habari za uongo na kuchochea taswira ya machafuko, jibu pekee lenye nguvu ni mshikamano wa vijana katika kulinda amani, ambayo ndiyo uti wa mgongo wa utalii wetu.
Vijana wanapaswa kuelewa kuwa mtalii haji nchi yenye simba na chui pekee, bali anakuja Tanzania kwa sababu ya utulivu wa kipekee ambao haupatikani kwa majirani zetu. Kila mara kijana anapochagua amani badala ya vurugu, na maridhiano badala ya chuki, anakuwa ameongeza thamani ya sekta ya utalii.
Amani yetu ndiyo inatutofautisha na mataifa yanayokumbwa na maandamano na misukosuko ya kisiasa, na ndiyo maana washindani wetu wanahangaika usiku na mchana kutafuta namna ya kuivuruga kupitia propaganda.
Wajibu wa kijana Kwenye mitandao badala ya kutumika kusambaza picha na habari zinazoweza kutia doa taswira ya nchi, vijana wanahimizwa kuwa mabalozi wa uzuri wa Tanzania.
Katika ulimwengu ambapo "fake news" husambaa kwa kasi, kijana mzalendo ni yule anayetumia simu yake kukanusha uongo kwa kuonesha ukweli wa amani iliyopo mitaani kwetu, ufukweni, na kwenye mbuga zetu. Kila picha ya tabasamu la Mtanzania na kila video inayoonyesha utulivu wa nchi ni pigo tosha kwa vyombo vya habari vya nje vinavyojaribu kuzuia wageni wasije nchini.
Utalii ni Ajira, Amani ni Mtaji
Vijana ndio wanufaika wakuu wa sekta ya utalii kupitia ajira za uongozaji watalii, hotelini, sanaa, na teknolojia. Hivyo basi, kulinda amani si jambo la kisiasa, bali ni kulinda mkate wa kila siku. Ikiwa vijana wataruhusu uchochezi na propaganda za nje ziwagawanye, wa kwanza kuumia ni kijana aliyeko mtaani ambaye fursa yake ya ajira itatoweka pale mgeni anapoahirisha safari yake kwa hofu ya usalama.
Simameni Imara kama Ukuta
Serikali, kupitia viongozi kama Dkt. Hassan Abbas, inaendelea kutoa takwimu zinazoonyesha ukuaji wa kihistoria wa sekta hii, lakini nguvu ya takwimu hizo inategemea utulivu unaojengwa na vijana. Ni wakati wa vijana wa Kitanzania kusimama kama ukuta imara, wakikataa kuwa vyombo vya chuki na badala yake kuwa walinzi wa amani. Tukihakikisha nchi yetu inabaki salama, hakuna kiasi cha uongo kutoka kwa majirani kitakachoweza kuzuia ulimwengu kumiminika kuiona Tanzania.
Tanzania ni yetu, na utalii ni urithi wetu. Tuulinde kwa amani, tuukuze kwa uzalendo!
Social Plugin