DKT. MALASUSA AKEMEA UZANDIKI NA TABIA ZA KICHONGANISHI

Katika kile kinachoonekana kama hatua ya kurejesha utulivu wa kijamii na kiroho nchini, Mkuu wa Kanisa la Kiinjili la Kilutheri Tanzania (KKKT), Askofu Dkt. Alex Malasusa, ametoa ujumbe mzito wa Krismasi unaokemea tabia za uchonganishi. 

Katika mahubiri yake yaliyofanyika kwenye Kanisa la Azania Front Cathedral jijini Dar es Salaam, Askofu Malasusa amejipambanua kama kiongozi anayetafuta "njia ya katikati" (diplomasia) wakati huu ambapo anga ya kijamii imetawaliwa na kile kinachoonekana kama msimamo mkali na ushupavu wa kauli kutoka kwa Baraza la Maaskofu Katoliki (TEC).

Askofu Malasusa ameweka wazi kuwa kuna kundi la watu ndani ya jamii ambao hupata mahangaiko ya nafsi pindi wanapoona Watanzania wakiishi kwa amani na mshikamano. 

Amesema kuwa tabia ya kuchafua taswira za watu wengine na kuichonganisha jamii ni jambo linalopaswa kukemewa kwa nguvu zote, kwani kufanya hivyo ni kumtumikia shetani ambaye kazi yake kubwa ni kuona familia na taifa vikigawanyika. 

Alisisitiza kuwa amani si kitu cha kuchukulia mzaha, bali ni tunu inayopaswa kutafutwa na kulindwa kwa gharama yoyote, kwani bila hiyo, shughuli za kiuchumi husimama na kuleta umaskini kwenye ngazi ya familia hadi taifa.

Kwa upande mwingine, ujumbe wa Askofu Malasusa umekuja wakati ambapo Serikali imekuwa ikijaribu kunyoosha mahusiano na taasisi za kidini. Akijibu mahubiri hayo, Waziri Mkuu ,Dkt. Mwigulu Nchemba, amesisitiza umuhimu wa viongozi wa dini kushirikiana na Serikali kupinga migawanyiko. 

Kauli ya Serikali imejikita katika ukweli kuwa vita ya wenyewe kwa wenyewe haina mshindi, na badala yake sote tunashindwa kama taifa. Hii inaashiria utayari wa Serikali kupokea ushauri wa viongozi wa dini wanaotumia lugha ya maridhiano kama Dkt. Malasusa, huku kukiwa na mtazamo wa tahadhari dhidi ya taasisi zinazoonekana kuwa na msimamo mkali zaidi.

Mwishoni mwa ibada hiyo, Askofu Malasusa amewataka Watanzania kuwa watu wa toba na msamaha. Amesema kuwa licha ya magumu na huzuni ambazo jamii imepitia katika kipindi hiki, Mwenyezi Mungu ana uwezo wa kubadilisha huzuni hizo kuwa furaha ikiwa tu watu watatubu na kuacha chuki. Amewasihi wazazi na walezi kuimarisha misingi ya maadili kwa vijana, ili taifa liwe na kizazi chenye uzalendo na kinachothamini amani kuliko malumbano yasiyo na tija.

Ujumbe huu wa Krismasi unatafsiriwa na wachambuzi wengi kama wito wa kutuliza mihemko ya kijamii. Ni mwito wa kurejea kwenye meza ya mazungumzo na kuachana na tabia za kuchafuana zinazoweza kulibomoa taifa.