Katibu tawala mkoa wa Shinyanga Albert Msovela akizungumza wakati wa uzinduzi wa Mfumo wa Mzabuni Teule “Prime Vendor System” yaani Mfumo Jazia Dawa,Vifaa Tiba na Vitendanishi mkoa wa Shinyanga Desemba 13,2016 katika ukumbi wa mikutano wa ofisi ya mkuu wa mkoa wa Shinyanga-Picha na Kadama Malunde-Malunde1 blog
TAARIFA KWA UMMA KUPITIA
VYOMBO VYA HABARI, SHINYANGA, 13 DISEMBA 2016
Mfumo
Jazia Dawa,Vifaa Tiba Na Vitendanishi kwa
kutumia Mzabuni mmoja (Prime Vendor) ni moja ya mafanikio ya ushirikiano wa
sekta binafsi na serikali ukiwa na lengo la kujazia upatikanaji wa dawa, vifaa
tiba na vitendanishi katika vituo vya uma vya kutolea huduma za afya pale
ambapo bohari kuu ya dawa inashindwa kukidhi mahitaji ya vituo vya kutolea
huduma. Manunuzi yanafanywa kutoka kwa mzabuni mmoja tuu katika mkoa.
Upatikanaji
wa dawa, vifaa tiba na vitendanishi ni moja ya misingi ya uendeshaji mfumo wa
huduma za afya.
Hivyo basi dawa na vifaa tiba vikipatikana katika vituo vya
kutolea huduma unawapa motisha watoa huduma katika maeneo yao ya kazi na husababisha
jamii kuuamini mfumo wa afya wa umma, na kutoa fursa kwa wagonjwa kupata huduma
bora.
Upatikanaji wa dawa unachukuliwa ni kama huduma nzuri za afya, licha ya
kwamba kuna huduma zingine muhimu kama lugha nzuri upatikanaji wa huduma kwa gharama
nafuu na kwa wakati.
Ila kwa dhana ya kuwa na huduma bora za afya nchini,
upatikanaji wa dawa katika vituo vyetu utachangia wingi wa watu kujiunga na mfuko
wa Afya ya Jamii (CHF).
Vituo
vya serikali vya mkoa wa Shinyanga vinapokea dawa, vifaa tiba na vitendanishi
kutoka Bohari Kuu ya dawa. Taasisi hii ya serikali inafanya juhudi kubwa kuhakikisha
inakuwa na dawa zinazokidhi mahitaji ya vituo licha ya mfumo wake wa uagizaji
na usambazaji kuwa na changamoto za hapa
na pale hivyo kushindwa kukidhi mahitaji ya dawa ambayo yanahitajika.
Hivyo
Mkoa wa Shinyanga kwa kushirikiana na mradi wa Tuimarishe Afya (HPSS Project)
unaofadhiliwa na Serikali ya Uswizi kupitia Shirika lake la Maendeleo na
Ushirikiano (SDC) umeamua kutafuta njia ya kuziba pengo linalosababishwa na
ukosefu wa dawa, vifaa tiba na vitendanishi toka Bohari Kuu ya Dawa kwa kutumia
mfumo wa manunuzi nje ya Bohari Kuu ya Dawa unaohusisha mzabuni mmoja tuu kwa
Mkoa mzima.
Halmashauri
zina fedha za kununua dawa ila hukabiliwa na mlolongo mrefu wa manunuzi unaohusisha
wazabuni tofauti tofauti wasiokua na uwezo wa kukidhi mahitaji ya vituo ambao
pia unaongeza gharama ya dawa.
Hivyo kwa mfumo huu unaozinduliwa leo, mahitaji
ya kununua dawa kutoka vituoni kwa kila halmashauri yatatumwa kwa Mzabuni mmoja
aliyeteuliwa kwa kushirikisha halmashauri zote ndani ya mkoa. Dawa hizi
zitanunuliwa kwa kutumia vyanzo mbalimbali vya mapato kama CHF, NHIF, Papo kwa
Papo na Mfuko wa Pamoja wa Afya (Health basket funds).
Mchakato
wa kumpata Mzabuni umefuata taratibu zote za manunuzi ya uma. Mkoa una furaha kushuhudia
uzinduzi wa mfumo huu mkoani Shinyanga.
Mzabuni aliyeshinda
katika machakato huu ni Bahari Pharmacy Ltd na anaingia mkataba na Mkoa wa
Shinyanga ili kuhudumia halamshauri zote leo.
Huu utakuwa mwanzo mzuri wa utekelezaji wa mfumo huu na tukiamini dawa
zitapatikana na kujazia ule upungufu wa dawa, kwa kushirikiana na wadau wetu
Bohari Kuu ya dawa kama msambazaji mkuu wa dawa katika vituo vyetu vya
serikali.
Mkoa pia utashirikiana kwa karibu na Mamlaka ya chakula na dawa,
baraza la wafamasia, na kitengo cha wafamasia kilichopo Wizara ya Afya katika
kusimamia utekelezaji wa mfumo huu.
Kusaini tu mkataba kati ya Mkoa na Mzabuni sio mwisho, bali kuna miongozo ambayo ni rafiki kwa vituo vya
kutolea huduma na halmashauri imeandaliwa ili kuwezesha utekelezaji fanisi wa mfumo
huu ili kuleta matokeo yalikusudiwa.
Kila mhusika atapaswa kufuata miongozo
iliyopo katika kuagiza dawa na vifaa tiba kwa mfumo huu.
Katika hatua za kupunguza ukosefu wa dawa, matibabu yanayozingatia
miongozo ya kitabibu ni muhimu kufuatwa hasa ugawaji wa dozi stahiki kwa mgonjwa
lazima uzingatiwe.
Pia usimamizi wa dawa utaimarishwa ili kuhakikisha dawa
zinakuwepo vituoni muda wote.
Uzinduzi wa mfumo huu katika mkoa wa Shinyanga umefungua mwanga
mpya katika serikali na jamii kwa ujumla. Ushiriki madhubuti wa viongozi wa mkoa na wilaya ndio nguzo katika kuboresha mfumo huu wa manunuzi wa dawa.
Ni matumaini yangu mfumo
huu utasaidia kupunguza ukosefu na kuongeza upatikanaji wa dawa halmashauri na
vituo vyote vya mkoa wa Shinyanga. Mfumo huu unatoa nafasi kwa mijadala
mbalimbali ya kisera na hata kuja kutumika nchi nzima.
Albert G Msovela
Katibu Tawala Mkoa