 |
| Kamanda wa taasisi ya kuzuia na kupambana na rushwa (TAKUKURU)mkoa wa Shinyanga Gasto Mkono |
Wabunge
,madiwani na wakurugenzi wa halmashauri za wilaya mkoani Shinyanga wametakiwa
kuwaelimisha wananchi kuhusu elimu ya uraia na miradi mbalimbali wanayoianzisha katika maeneo
yao ili kujua gharama za miradi.
Wito huo
umetolewa jana na kamanda wa taasisi ya
kuzuia na kupambana na rushwa mkoa wa Shinyanga (TAKUKURU) Gasto Mkono kwenye kikao cha kamati ya ushauri ya mkoa huo
kilichofanyika mjini Shinyanga.
Mkono
amesema kama wananchi wataelimishwa kuhusu miradi ya maendeleo itasaidia kwa
kiasi kikubwa kupiga vita rushwa kwani takwimu zinaonesha kuwa miradi mingi
inajengwa chini ya viwango na kusababisha wananchi kulalamika kuwa kuna rushwa
imefanyika kutokana na kutojua gharama za miradi hiyo.
Kamanda huyo
wa TAKUKURU mkoa amesema ni vyema madiwani,wabunge na wakurugenzi wa
halmashauri wakawa wanatangaza miradi inayotekelezwa katika halmashauri za wilaya
ili kupunguza kasi ya rushwa katika mkoa wa Shinyanga ambapo hivi sasa kuna
malalamiko kuhusu miradi ya maendeleo ambayo baadhi imekuwa ikijengwa chini ya
kiwango mfano ile ya barabara ambapo baadhi ya viongozi na wakandarasi wamekuwa
wakilalamikiwa kuhusika zaidi.
Amewataka
viongozi na wadau mbalimbali likiwemo jeshi la polisi kuendelea kushirikiana na
taasisi yake huku akiwataka viongozi kuacha uoga katika kupambana na rushwa pamoja na kwamba
vita hiyo ni nzito kwani miongoni mwa wala rushwa ni watu wa karibu kabisa kama
vile ndugu na marafiki.
Takwimu za
mkoa wa Shinyanga katika kipindi cha kuanzia mwezi Januari hadi Desemba 2013
zinaonesha kuwa jumla ya tuhuma 15 kuhusiana na rushwa zilipatikana,ambapo kati
ya tuhuma hizo 15,9 zimehusisha idara ya afya,3 zilihusisha halmashauri(TASAF)
na 3 zilihusisha idara ya elimu,na katika kipindi hicho majalada 10
yalifunguliwa,8 yakapelekwa kwa mkurugenzi wa mashtaka(DPP) wakati majalada manne,yalipata vibali vya
mashitaka.
Katika
kipindi hicho pia TAKUKURU imeshinda kesi 7 na kushindwa kesi 5 na jumla ya
kesi mpya zilizofunguliwa mahakamani ni kesi saba.