.jpg)
Kampeni
za uchaguzi mdogo wa kiti cha udiwani katika kata Ubagwe Wilayani Kahama Mkoani
Shinyanga,zimeingia doasari baada ya watu wanaodhaniwa kuwa ni wafuasi CHADEMA
kuwavamia na kuwajeruhi vibaya kwa kuwacharanga mapanga wafuasi watano wa CCM.
Akiongea
na waandishi wa habari akiwa katika hospitali ya Wilaya ya Kahama akiwa miongoni
mwa majeruhi waliolazwa katika hospitali hiyo Katibu mwenezi wa CCM Wilaya ya Kahama Masood
Melimeli amesema tukio hilo limetokea jana majira ya saa moja na nusu usiku
wakati wakitokea katika kijiji cha Ihata kwenda Itobola katika kampeni.
Amesema
akiwa na wenzake walipofika katikati ya pori walikutana na gari la CHADEMA aina
ya Toyota land Cruser ikiongozwa na Mbunge wa Jimbo la Maswa Mashariki mkoani
Simiyu Sylivester Kasulumbayi na kuanza kuwashambulia kwa kutumia mapanga,
nondo pamoja na fimbo.
Katibu
mwenezi huyo wa CCM Masood Melimeli
amesema ameumia sehemu ya mkono na bega
huku wenzake akiwemo Ramadhani Salumu aliyepigwa panga la mguu na Mkono,
Sebastian Masonga aliyevunjwa mkono wa kushoto, dereva Charles Muhiga
aliyejeruhiwa sehemu za kichwani na mtendaji wa Kata ya Ubagwe Stephen Kimario
aliyepigwa vibaya sehemu za kichwani na wengine wawili walikimbia
kusikojulikana.
Akizungumzia
kuhusu tukio hilo mwenyekiti wa chama cha TADEA ,ambacho pia kinafanya kampeni
zake katika kata hiyo,Wilaya ya Kahama Charles Lubala amesema vurugu hizo
zilianza baada ya mfuasi mmoja wa CHADEMA kuvamia katika mkutano wa CCM na
ndipo CCM walipomkamata na kumuweka katika gari la CCM kwa lengo la kumpeleka
katika kituo kidogo cha Polisi Bulungwa.
Baada
ya kumuweka katika gari la CCM ndipo
wafuasi wa CHADEMA walipotangulia mbele na kuweka vizuizi barabarani na hivyo
kusababisha vita hivyo kufanyika na kupelekea watu hao kujeruhiwa akiwemo
mtendaji wa kata hiyo.
Hata
hivyo akizungumza na malunde1 blog kwa njia ya simu mwenyekiti wa CHADEMA
wilaya ya Kahama Juma Protas alisema..........
“Siyo
kweli kwamba tunahusika katika vurugu hizi,vijana watatu wa CHADEMA ndiyo
waliotekwa na CCM katika eneo la makao makuu ya kata ya Ubagwe,baada ya
kutekwa,wakafungwa kamba na kuingizwa kwenye gari la CCM,ndipo wananchi
walipokwenda kuwasaidia vijana hao ndipo ilipotokea purukushani kati ya
wananchi na wafuasi wa CCM”.
“Baada
ya purukushani hizo,CCM wakapiga simu polisi,polisi wakaenda kwenye kambi ya
CHADEMA na kupiga risasi juu kisha kuwakamata wafuasi 13 wa Chadema akiwemo
mbunge wa Maswa Mashariki Sylivester Kasulumbayi,CCM ndiyo waliteka vijana
watatu wa CHADEMA na vijana hawa hadi
sasa hawajulikani walipo”,aliongeza Protas.
“Katika
vurugu hizi chadema pekee wamekamatwa,nataka tu kuwaambia watu wa CCM,waache
demokrasia ifuate mkondo wake,wasitegemee kuwa kutumia nguvu siku zote
itasaidia,wananchi wanahitaji mabadiliko kwa njia ya amani na utulivu”,alisema
mwenyekiti huyo wa CHADEMA.
Akizungumza
na malunde1 blog kwa njia ya simu
Kamanda wa polisi mkoa wa Shinyanga ACP Evarist Mangala alithibitisha kutokea
kwa tukio hilo na kuongeza kuwa jeshi la polisi linawashikilia watu 13
kuhusiana na tukio hilo kwa mahojiano zaidi.
Kampeni
za Uchaguzi katika kata ya Ubagwe Wilayani Kahama Mkoani Shinyanga zinafanyika
kufuatia aliyekuwa diwani katika kata hiyo Richard Mndula kufariki dunia mwaka
jana vyama vitatu vya siasa ikiwemo CCM, TADEA pamoja na CHADEMA vinapigania
kiti hicho.