DC MTATIRO AENDESHA KLINIKI MAALUM KUSIKILIZA KERO NA MIGOGORO YA WANANCHI

 

Mkuu wa Wilaya ya Shinyanga Wakili Julius Mtatiro akisikiliza kero za wananchi na migogoro

ambapo zaidi ya wananchi 200 wamepatiwa huduma.

Na Stella Herman,Shinyanga

Kliniki ya kusikiliza kero na migogoro ya wananchi imefanyika Wilayani Shinyanga kwa mafanikio makubwa, ikiongozwa na Mkuu wa Wilaya ya Shinyanga, Wakili Julius Mtatiro.

Kliniki hiyo imefanyika leo Februari 26,2026 katika eneo la ofisi ya Mkuu wa Wilaya imelenga kuwapatia wananchi fursa ya kueleza changamoto zao moja kwa moja kwa uongozi wa serikali, pamoja na kutafuta suluhu za haraka na za kudumu.

Wananchi wamejitokeza kwa wingi kushiriki kliniki hiyo, wakitoa kero mbalimbali zinazowakabili ambapo zaidi ya wananchi 200 wamejitokeza na kusikilizwa na mkuu wa Wilaya Mtatiro na wasaidizi wake.

Ushiriki huo mkubwa umeonesha imani ya wananchi kwa serikali yao pamoja na utayari wa kushirikiana katika kutatua migogoro kwa njia ya amani na kisheria.

Changamoto kubwa iliyojitokeza wakati wa kliniki hiyo ni uwepo wa migogoro mingi ya ardhi, ikiwemo mipaka ya mashamba, umiliki wa viwanja, na matumizi ya ardhi. Migogoro hiyo imeonekana kuathiri ustawi wa jamii na kuchelewesha maendeleo ya wananchi wengi.

Kwa mujibu wa maelezo yaliyotolewa, chanzo kikuu cha migogoro hiyo ni wananchi wengi kutokuwa na uelewa wa kutosha kuhusu masuala ya ardhi, hususan taratibu za umiliki, upimaji, na usajili wa ardhi.

Hali hiyo imepelekea migongano ya mara kwa mara kati ya wananchi, familia, na hata taasisi.

Akizungumza katika kliniki hiyo, Mkuu wa Wilaya alisisitiza umuhimu wa wananchi kupata elimu ya ardhi ili kupunguza migogoro isiyo ya lazima,ambapo amesema serikali itaendelea kushirikiana na wataalamu wa ardhi pamoja na viongozi wa maeneo husika kuhakikisha wananchi wanapatiwa taarifa sahihi na msaada wa kitaalamu.

Wananchi waliopata nafasi ya kusikilizwa wameishukuru serikali kwa kuanzisha kliniki hiyo, wakisema imewapa matumaini mapya ya kupatiwa haki na suluhu za changamoto zao.

Serikali imesisitiza kuwa kliniki za aina hii zitaendelea kufanyika mara kwa mara ili kuimarisha mawasiliano kati ya wananchi na viongozi, na kujenga jamii yenye mshikamano na maendeleo endelevu.

watumishi wa Halmashauri wakiwa tayari kusikiliza kero na migogoro ya wananchi

Mkuu wa Wilaya ya Shinyanga Wakili Julius Mtatiro akisikiliza kero za wananchi