Usimamizi wa shamba hilo umejikita katika matumizi ya teknolojia ya hali ya juu ikiwemo mifumo ya umwagiliaji kwa njia ya matone na uchimbaji wa visima virefu, jambo ambalo limehakikisha uzalishaji unaendelea bila kutegemea mabadiliko ya hali ya hewa.
Meneja Msaidizi Muthana Maruvand anabainisha kuwa utaalamu wa kimataifa katika uzalishaji na usindikaji umekuwa nguzo muhimu inayolifanya shamba hilo kuzalisha kahawa ya daraja la juu kwa ajili ya soko la kimataifa, huku likitoa ajira kwa zaidi ya watu 6,400.
Mafanikio hayo ya kilimo hayatokei kwa bahati mbaya, bali ni matokeo ya juhudi za kimkakati za serikali. Kuimarika kwa uzalishaji wa kahawa nchini, unaoingiza zaidi ya Dola za Marekani milioni 250 kwa mwaka, kumechochewa na sera za uwekezaji zilizoboreshwa ili kuondoa vikwazo vya masoko na kuvutia wadau makini kama Aviv Tanzania Limited.
Mkakati wa Kuendeleza Sekta ya Kahawa 2021–2026 na Sheria ya Uwekezaji Tanzania zimetajwa kuwa nyenzo kuu zilizofungua milango kwa uwekezaji huu mkubwa. Sheria hizi zimewezesha kampuni kuuza moja kwa moja kahawa nje ya nchi kwa asilimia 60, hatua inayoongeza mapato ya fedha za kigeni na kuimarisha mnyororo wa thamani wa zao hilo bila kuingiliwa na urasimu wa wauzaji wa kati.
Usimamizi huu makini haujaishia kwenye uzalishaji pekee, bali umegusa maisha ya kijamii ambapo wakazi wa vijiji vya Lipokela na Liganga wameona thamani ya makazi yao ikiongezeka na kupata fursa za ajira zenye uhakika. Kupitia maelekezo ya serikali kuhusu uwajibikaji wa kijamii (CSR), uongozi wa shamba sasa unaelekeza nguvu katika kusaidia wakulima wadogo kwa kuwashushia ujuzi na miundombinu ya umwagiliaji ili kuhakikisha kuwa ukuaji wa uchumi wa taifa unakwenda sambamba na ustawi wa mwananchi mmoja mmoja vijijini.
Social Plugin