Askari wa jeshi la wananchi (JWTZ) Ng’habi Mayenzi (48), kikosi
cha kambi ya Kizumbi 516 KJ, Shinyanga amesababisha kifo cha mtoto wa askari
polisi papo hapo Ester Daudi(05) baada ya kumgonga na pikipiki.
Kwa mujibu wa taarifa iliyotolewa na kamanda wa jeshi la
Polisi mkoani Shinyanga kwa vyombo vya habari Justus Kamugisha ,alisema tukio
hilo limetokea Machi 26 mwaka huu,majira ya saa saa saba mchana katika eneo la
kanisa la Wasabato barabara ya stendi ya mjini Shinyanga kuelekea Kambarage.
Alisema pikipiki iliyosababisha kifo cha mtoto Ester Daudi
(05), ambaye pia ni mwanafunzi wa chekechea na mkazi wa kambi ya jeshi la
Polisi kata ya Kambarage ni yenye namba za usajili MC 411 ADB aina ya Kinlion.
Alisema mtoto aliyegongwa ni mtoto wa askari wa jeshi la
polisi mkoa wa Shinyanga CPL Daudi.
Aliongeza kuwa chanzo cha ajali hiyo ni mwendo kasi aliokuwa
nao mwanajeshi Ng’habi Mayenzi, ambapo baada ya kumgonga mtoto huyo na
kusababisha kifo chake naye alikimbizwa katika hospitali ya mkoa wa Shinyanga
kutokana na kuumia vibaya sehemu mbalimbali za mwili wake.
Aidha Kamugisha alisema,kutokana na majeraha aliyokuwa nayo
mwanajeshi huyo, hali ilizidi kuwa mbaya na ilipofika Machi 27, majira ya saa moja asubuhi alifariki dunia.
Na Kadama Malunde-Shinyanga