ILO YAZINDUA MWONGOZO WA HABARI ZA UHAMAJI; JOWUTA YATIA NENO

Mwandishi wetu, Mombasa

Shirika la Kimataifa la Kazi Duniani (ILO), limezindua mwongozo wenye kanzi data kwa wanahabari kuandika na kutangaza habari za wahamaji.

 

Mwongozo huo umezinduliwa  Ijumaa, Juni 20,2026 na Mshauri Mkuu wa Kiufundi kutoka ILO, Charles Autheman  katika warsha ya viongozi  wa Vyama vya Wafanyakazi vya Wanahabari katika Ukanda wa Afrika ya Mashariki inayoendelea Mombasa nchini Kenya.

Akizindua mwongozo huo, Autheman amesema  sasa  unapatikana katika mtandao wa ILO ukiwa katika Lugha ya Kingereza, Kifaransa, Kiarabu na nyinginezo isipokuwa Kiswahili.

Mtaalam huyo amesema bado kuna changamoto katika uandishi wa habari za wahamaji na wakimbizi hivyo ILO imetoa mwongozo huo ili kurahisisha uandishi ikiwamo matumizi ya maneno yasiyo na ukakasi.

Akizungumza katika uzinduzi huo, Mwenyekiti wa Chama Cha Wafanyakazi katika Vyombo vya Habari Tanzania (JOWUTA), Mussa Juma  ameshauri ILO kuandaa  pia mwongozo huo kwa Lugha ya Kiswahili  kwa kuwa  ni lugha ya kimataifa ambayo inakua kwa kasi duniani na kuwafikia watu wengi.

"Tunalifanyia kazi lakini pia Tanzania mnaweza kutafsiri mwongozo huu kwa lugha ya Kiswahili," amesema mtalaam huyo akijibu hoja hiyo.

Warsha hiyo imeandaliwa na ILO kwa kushirikiana na Shirikisho la Wanahabari Afrika (FAJ), Shirikisho la Wanahabari Afrika Mashariki (FEAJ) na Chama cha Waandishi nchini Kenya (KUJ)  .

Warsha hii ya kikanda imehudhuriwa na viongozi wa vyama na mashirika ya wanahabari kutoka Comoro, Jibuti, Ethiopia, Kenya, Rwanda, Sudan, Somalia, Sudan Kusini, Tanzania na Uganda.